London sığorta bazarı "Lloyd of London" Ukraynaya uçan və onun ərazisində qalan təyyarələri sığortalamağı dayandırmır, lakin aviadaşıyıcılar xüsusi sığorta şərtləri ilə razılaşmalı olacaqlar.

Marja xəbər verir ki, bu barədə bazar ertəsi "Reuters" agentliyinə sığorta bazarının nümayəndəsi məlumat verib.

"Lloyd's"un dəniz və aviasiya sığortasının rəhbəri Neil Roberts bildirib ki, sığortaçılar daha əvvəl müştərilərə Ukraynaya uçan təyyarələrin sığortasını dayandırmaq hüququ barədə məlumat vermişdilər və sığorta müddətinin bitməsinə 48 saat qalmış xəbərdarlıq etmişdilər. Bununla belə, Robertsin fikrincə, həmçinin bu, “sığorta şərtlərini yenidən müzakirə etməyə dəvətdir”. O, qeyd edib ki, bəzi hallarda hərbi münaqişə riskini əhatə edən sığortaların verilməsi mümkündür, lakin belə müqavilələrin şərtlərinə çox tez-tez - bəzən hər 24 saat və ya 48 saatdan bir yenidən baxıla bilər. Belə sığortanın qiyməti də kifayət qədər yüksək olacaq.

Ukraynanın SkyUp aviaşirkəti bazar günü bildirib ki, şənbə günü Portuqaliyanın Funşal şəhərindən Kiyevə uçan təyyarənin sahibi olan İrlandiya firması Ukraynanın hava məkanına girişinə qadağa qoyulduğunu bildirdiyi üçün onun yönü Kişinyova keçirilib. Hollandiyanın KLM aviaşirkəti şənbə günündən etibarən Ukraynaya uçuşları dayandırıb, həmçinin hava məkanından istifadəni dayandırıb. Eyni zamanda, Ukraynanın Dövlət Aviasiya Xidmətinin rəhbəri Oleksandr Bilçuk Ukrayna hava məkanının açıq qaldığını bildirib. 

Son zamanlar Qərb ölkələrində, eləcə də Ukraynada Rusiyanın Ukrayna ərazisinə mümkün müdaxiləsi ilə bağlı bəyanatlar səslənir. Rusiya prezidentinin mətbuat katibi Dmitri Peskov bu cür məlumatları boş və əsassız gərginliyin artması adlandırıb. Peskov vurğulayıb ki, Rusiya heç kim üçün təhlükə yaratmır. Eyni zamanda, o, bu cür bəyanatlar ilə təxribatların mümkünlüyünü istisna etməyib və Ukraynanın cənub-şərqindəki böhranın güc yolu ilə həlli cəhdlərinin ən ağır nəticələrinin olacağı barədə xəbərdarlıq edib.

"Lloyd's of London" tanınmış sığorta bazarıdır və bəzən səhv olaraq sığorta şirkəti olduğu bilinir. "Lloyd's of London" sığorta və təkrarsığorta müqavilələri bağlamaq üçün anderrayterlərin sığorta brokerləri ilə görüşdüyü yerdir.