Əfqanıstanda radikal Taliban hərəkatının silahlıları ölkədə hakimiyyəti ələ keçirdikləri andan dollar qarşısında 53% dəyər itirən milli valyuta Əfqaninin çökməsi fonunda ərzaq inflyasiyasında kəskin artım davam edir.

Marja.az xarici mətbuata istinadən xəbər verir ki, ölkədəki bir neçə iri topdansatış mağazası ötən həftələr ərzində kəskin artan əsas ərzaq məhsullarının qiymətlərinin artması fonunda son günlər fəaliyyətini bağlamaq məcburiyyətində qalıblar.

Belə ki, bir neçə gün əvvəl 10 əfqani olan 200 qramlıq çörək indi 15 əfqaniyə satılır. İki ay əvvəl 44 əfqani olan 1 kiloqram un indi 57 əfqaniyə satılır.

Avqustda təxminən 80 əfqani səviyyəsində olan dolların məzənnəsi valyutaya tələbin artması ilə 123 əfqaniyə çatıb. Sərt tədbirlər, o cümlədən ölkədən dollar çıxarılmasına görə cinayət məsuliyyəti də onun aşağı düşməsinə kömək etməyib. 

Bazar günü rəsmilər Əfqanıstanın ən böyük valyuta bazarı olan Kabildə yerləşən Saray-e Şahzadəni bağlayıblar. Səbəb kimi həddindən artıq sıxlıq göstərilib.

Taliban tərəfindən təyin olunan Əfqanıstan müvəqqəti hökumətinin sədr müavini Əbdül Salam Hənəfi çərşənbə axşamı mətbuat konfransı keçirərək dollar qaçaqmalçılığını milli xəyanətkarlıq elan edib.

“Onlar milli satqınlardır və həbs olunsalar, onlara uyğun davranılacaq. Əfqanlar gündəlik əməliyyatlarında öz milli valyutalarından istifadə etməlidirlər, xaricə dollar qaçaqmalçılığı cinayətdir”, - deyə Hənəfi bildirib.

Kabil hakimiyyəti un və qazın bahalaşması fonunda tacirləri manipulyasiyada ittiham edərək çörəyin qiymətinin dondurulduğunu elan edib. Əfqanıstanın Sənətkarlar və Dükançılar Palatası Böyükşəhər Bələdiyyəsi ilə razılaşaraq, müvəqqəti olaraq 200 qramlıq çörəyin qiymətini 15 əfqani (təxminən 0,12 dollar), 270 qramlıq çörəyin qiymətini isə 20 əfqani (təxminən 0,16 dollar) müəyyən edib. Bu tədbirlər “insanların qida ilə təminatında fasilələrin qarşısını almaq üçün” görülüb.

Birləşmiş Millətlər Təşkilatının Ərzaq və Kənd Təsərrüfatı Təşkilatı (FAO) Əfqanıstan əhalisinin yarıdan çoxunun (təxminən 22,8 milyon nəfər) noyabr-mart ayları arasında kritik ərzaq çatışmazlığı ilə üzləşə biləcəyini proqnozlaşdırır.