OPEC, neftə tələbatın artıması üzrə proqnozunu dəyişməz saxlayıb

OPEC, neftə tələbatın artıması üzrə proqnozunu dəyişməz saxlayıb

Neft İxrac Edən Ölkələr Təşkilatı (OPEC) 2021 və 2022-ci illərdə neftə tələbatın artıması üzrə proqnozunu müvafiq olaraq gündəlik 5,7 milyon barel və 4,2 milyon barel səviyyəsində saxlayıb.

Marja.az xəbər verir ki, bu barədə təşkilatın dekabr hesabatında bildirilir.

Hesabata görə, qlobal neft tələbi bu il keçən illə müqayisədə gündəlik 5,7 milyon barel artaraq 96 milyon 440 min barelə çatacaq. Gələn il isə qlobal neft tələbi 4 milyon 150 min barel artaraq gündəlik təxminən 100 milyon 590 min barel olacaq.

“Əvvəllər dördüncü rübdə gözlənilən tələbin bərpası 2022-ci ilin birinci rübünə keçir. Bunun ardınca 2022-ci il ərzində daha sabit bərpa müşahidə olunacaq”, - deyə hesabatda bildirilir.

Eyni zamanda, OPEC-ə daxil olmayan ölkələrdən neft tədarükü 2022-ci ildə gündə 3 milyon barel artacaq. 2021-ci il üçün təxmin dəyişməz qalıb - 0,7 milyon barel artım ilə 63,7 milyon barel/gün. Bu il əsas istehsal artımı Kanada, Rusiya, Çin, ABŞ, Norveç və Qayanada gözlənilir. Eyni zamanda Böyük Britaniya, Kolumbiya, İndoneziya və Braziliyada da istehsal azalacaq.

OPEC-in aylıq neft bazarı hesabatına görə, qlobal neft hasilatı keçən ay bir əvvəlki ayla müqayisədə gündəlik 880 min barel artımla təxminən 98 milyon 280 min barelə yüksəlib. Bu dövrdə OPEC-ə üzv olmayan ölkələrdə gündəlik neft istehsalı 590 min barel artaraq təxminən 70 milyon 560 min barel təşkil edib. OPEC-in gündəlik xam neft istehsalı isə 290 min barel artaraq təxminən 27 milyon 720 min barel səviyyəsində reallaşıb. OPEC-in qlobal neft istehsalındakı payı 28,2 % təşkil edib.

Bu dövrdə OPEC daxilində xam neft istehsalı ən çox Səudiyyə Ərəbistanı və İraqda artarkən, Anqola və Libyada isə azalıb.

13.12.2021 21:16

📲 İndi
Marja.az-ın WhatsApp kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az