Neft-qaz şirkətlərinin layihələrə investisiyalarının yığılmış kəsiri 600 milyard dollara qədər arta bilər. 

Marja xəbər verir ki, bu barədə XIV Avrasiya İqtisadi Forumu çərçivəsində keçirilən “İqtisadiyyatda struktur dəyişiklikləri və enerjinin gələcəyi” adlı sessiyada “Rosneft”in rəhbəri İqor Seçin bildirib.

Onun sözlərinə görə, xeyli sayda neft-qaz şirkətləri uzunmüddətli tələb və neft qiymətləri ilə bağlı qeyri-müəyyənlik şəraitində layihələrə investisiyaları artırmağı planlaşdırmır. Seçin bildirib ki, 2021-ci ildə investisiyalar 2014-cü ildəkinin yarısı qədər olacaq.

“Layihələrin həyata keçirilməsində mövcud tendensiyalara əsasən, 2021-2025-ci illərdə neftə olan tələbatın ödənilməsi üçün zəruri olan investisiyaların yığılmış kəsiri 135 milyard dollara çata bilər. Əgər investisiyalar hazırkı səviyyədə qalsa, 2030-cu ilə qədər onların yığılmış kəsiri 600 milyard dollara çatacaq”-  deyib.

"Rosneft" rəhbərinin sözlərinə görə, iqlim gündəmi artıq bütün enerji sektoruna mənfi təsir göstərir. Xüsusilə, ötən il neft-qaz şirkətlərinin geoloji kəşfiyyata yatırdıqları investisiyaların həcmi 3 dəfə azalaraq 5 milyard dollar təşkil etdiyi halda, 2011-2015-ci illərdə bu rəqəm orta hesabla ildə 16 milyard dollar təşkil etmişdi.

Seçin əlavə edib ki, geoloji-kəşfiyyat işlərinin kifayət qədər maliyyələşdirilməməsi səbəbindən dünyadakı anbarlarda neft və qaz ehtiyatlarının doldurulma səviyyəsi artıq dördüncü ildir aşağı düşür. Artıq tədarük çatışmazlığı riskləri qiymətlərə təsir göstərir. 

Eyni zamanda, neft və qaz layihələrinə investisiya qoymaqdan imtinanın tərəfdarları bazar balansının pozulması risklərini görmürlər. “Bu il açıq şəkildə göstərdi ki, iqlim siyasəti sahəsində yanlış qərarlar bütün dünya iqtisadiyyatı və cəmiyyəti üçün ciddi mənfi nəticələrə səbəb ola bilər. Bunun fonunda neft və qaza investisiyaların dayandırılması tələbləri daha çox səslənir. İnsanda belə bir təəssürat yaranır ki, bəzi hallarda mineral yanacaqlardan sürətlə uzaqlaşmanın tərəfdarları bazarlarda qaçılmaz disbalans risklərinə məhəl qoymurlar", -deyə Rosneft rəhbəri vurğulayıb.