“Expressbank” ASC 2021-ci ilin 3-cü rübünün yekunlarına dair maliyyə göstəricilərini açıqlayıb.

Bankın yaydığı məlumatda bildirlir ki, “Expressbank” 2021-ci ilin 9 ayını (3 rübünü) 8,13 milyon manat xalis mənfəət ilə başa vurub. Bu da, keçən ilin müvafiq dövrü ilə müqayisədə 9% artım deməkdir.

Məlumatda bildirilir ki, illərdir müştərilərinə göstərdiyi yüksək və peşəkar xidmətlə onların etibarını qazanan Bank üçüncü rübdə həm əmanət, həm də kredit portfelini artırmışdır.

Belə ki, Bankın depozit portfeli keçən ilin müvafiq dövrü ilə müqayisədə 17% artaraq 138,3 milyon manat, kredit portfeli isə 15% artaraq 242,1 milyon manat təşkil edib. Bankın aktivləri keçən ilin müvafiq dövrü ilə müqayisədə 4.9% artaraq 328,8 milyon manat təşkil edib.

“Expressbank” ASC qeyd edilən dövr ərzində faiz və qeyri-faiz gəlirlərini də artırmağa müvəffəq olub. İyul-sentyabr ayları üzrə keçən ilin analoji dövrü ilə müqayisədə faiz gəlirləri 2,7% artaraq 30,77 milyon manat, qeyri-faiz gəlirləri 4,7% artaraq 10,08 milyon manat təşkil edib. Bankın faiz xərcləri isə 12% azalaraq 5,28 milyon təşkil edib. Ümumilikdə, Bank 9 ayı 25.49 milyon manat xalis faiz gəliri ilə başa vurub.

“Expressbank” ASC Mərkəzi Bank tərəfindən müəyyən olunmuş bütün prudensial normativlərdən dəfələrlə artıq nəticə göstərməklə bir daha bankın maliyyə cəhətdən sağlam və dayanıqlı olduğunu sübut edib. Belə ki, müvafiq dövrün sonuna Bankın I dərəcəli kapitalın adekvatlıq əmsalı 39.6%, məcmu kapital adekvatlıq əmsalı 43.39%, leverec əmsalı isə 33.96% təşkil edib. Bankın məcmu kapitalı isə 126.21 milyon manat təşkil edib.

Məlumatda qeyd edilib ki, iqtisadi mühit, müştəri portfelinin dinamikası və keyfiyyəti, artım perspektivləri, şəffaflıq, gəlirlilik, və s. kimi vacib göstəricilər əsasında bankları qiymətləndirən Beynəlxalq Reytinq Agentliyi  “Fitch Ratings” “Expressbank” ASC-nin biznes strategiyası, uğurlu siyasəti, stabil maliyyə göstəricilərinə yüksək qiymət verərək Bankın reytinqini “B” səviyyəli “stabil” proqnozu ilə təsdiqləyib.

Şəffaf maliyyə tərəfdaşlığı və müştərilərinin ehtiyaclarını əsas götürərək daim yeni kampaniyalara və layihələrə imza atan “Expressbank” ASC, hər zaman müştəri məmnuniyyətinin təmin olunmasına xüsusi önəm verir.