ABŞ rəhbərliyi, Neft İxrac Edən Ölkələr Təşkilatına (OPEC) neft bazarlarında qiymətləri aşağı salmaq üçün təzyiq göstərir.

Marja xəbər verir ki, bu barədə cümə axşamı Ağ Evin mətbuat katibi Jen Psaki jurnalistlər üçün keçirdiyi müntəzəm brifinqdə bildirib.

O, ABŞ administrasiyasının rəhbəri Co Baydenin ölkədə yüksək yanacaq qiymətlərinin davam etməsindən narahat olduğunu bildirib.

Psaki, "Prezident bu işə çox diqqət yetirir" deyib. Onun sözlərinə görə, Ağ Ev adminitrasiyasının mütəxəssisləri bu problemlə "hər gün" məşğul olurlar.

"Deyərdim ki, bu (qiymətlərin yüksək olması - red), qismən təklif məsələsinə aiddir (OPEC+un hasilatı azaltmasına işarə edir - red). Bu mövzuda (hasilatı daha çox artırması üçün - red) OPEC-ə təzyiq etməyə davam edirik", - Amerika liderinin mətbuat katibi deyib.

 "Ancaq bu, qismən də logistika məsələsidir, yanacağın ölkə daxilində tədarükü üzrə hərəkət variantlarını nəzərdən keçiririk. Həm təchizat, həm də logistika məsələsi üzərində işləyirik. Bir çox variant araşdırırıq", -  Ağ Evin sözçüsü deyib.

"ABŞ neftin qiymətinin aşağı salınması məsələsində Rusiyaya üz tutmayıb"

Neftin qiymətinin aşağı salınması ilə bağlı müzakirələrin aparılması ehtimalı ilə bağlı ABŞ-dan Rusiyaya heç bir müraciət daxil olmayıb. Bunu Rusiya baş nazirinin müavini Aleksandr Novak cümə axşamı CNBC-yə müsahibəsində bildirib.

"Düzünü desəm, heç kim bizimlə əlaqə saxlamayıb. Media bu cür istəklər haqqında yazıb, amma bunların doğru olub olmadığını bilmirəm. Əslində ABŞ və Səudiyyə Ərəbistanı arasında hər hansı bir danışıqlar haqqında ən kiçik bir fikrimiz yoxdur", - Novak, telejurnalistin Amerika rəhbərliyinin müvafiq təkliflərlə Rusiyaya müraciət edib-etməməsi ilə bağlı sualına cavab verib.

Hazırda London birjasında Brent markalı neftin fyuçers müqaviləsinin qiyməti 1 barrelə görə 83 dollar civarında, WTI fyuçersi isə 81 dollar / barel civarındadır.

OPEC + ölkələrinin nazirləri oktyabrın 4-də keçirilən iclasda neft hasilatını noyabr ayında da 400 min barel artırmağa davam etmək qərarına gəliblər. Beləliklə, oktyabr ayında OPEC + ölkələri neft hasilatını sutkada 4.559 milyon barel, noyabrda isə 4.159 milyon barel azaldacaq.