Türkiyə Cümhuriyyəti Mərkəzi Bankının (TCMB) keçən ay faiz endiriməsindən sonra Türk Lirəsinin ucuzlaşması sürətlə davam edir.

Marja xəbər verir ki, üstəlik ABŞ istiqrazlarının da gəlirliliyinin artması ilə, dollar/TL məzənnəsi 9 səviyyəsini aşaraq tarixinin ən yüksək səviyyəsini görüb.

Bakı vaxtı ilə saat 22:50-də dollar/TL məzənnəsi 9.0178-də olub. Avro/TL məzənnəsi isə 10,4211 səviyyələrində əməliyyat olunub.

Qlobal inflyasiya narahatlıqları ilə əlaqədar investorların daha riskli aktivlərə "iştahı" azalıb. Türk Lirəsi də riskli aktivlərdən biri hesab olunur.  

Türk Lirəsinin ucuzlaşmasına Prezident Rəcəb Tayyib Ərdoğanın Suriya ilə bağlı açıqlaması da təsir göstərib.

"Suriyadan ölkəmizə istiqamətlənmiş hücumların qaynağı mahiyyətindəki yerlər mövzusunda artıq dözümümüz qalmamışdır. Suriyadan qaynaqlanan təhdidləri, oralarda təsirli olan güclərlə birlikdə ya da öz imkanlarımızla aradan qaldırmaqda qərarlıyıq",- Ərdoğan deyib.

Türk Lirəsi, TCMB-nin 23 Sentyabrda bazar proqnozunun əksinə faizini aşağı salmasının ardından keçən ay 5,9% dəyər itirib.

"ƏRDOĞAN TƏKRAR SEÇİLSƏ DOLLAR 20 TL OLAR"

Məmləkət Partiyasının sədri Muharrem İnce "Ərdoğan seçilsə dollar 8-10 TL olar" şərhini xatırladaraq bu ifadələri istifadə edib:

"2018-də Ərdoğan seçilsə dollar 8-10 TL olar demişdim. 1 dollar 9 TL oldu. Ərdoğan təkrar seçilsə dollar 18-20 TL olar. Millətin müqəddaratı, millətin əlindədir".

İyi Partiyanın sədr müavini Bahadır Erdem, "Mərkəzi Bankın sədri "məzənnənin faiz endirimi ilə əlaqəsi yoxdur" dedi, 1 Dollar 9TL olaraq tarixi zirvəni gördü! Mərkəzi Bankın sədri cənab Kavcıoğlu otağını yığışdırmağa başlamışdır hərhalda", - ifadələrini paylaşıb.

CHP-nin spikeri Faik Öztrak sosial mediadan mövzu ilə əlaqədar etdiyi açıqlamada bu ifadələri istifadə edib:

"Məsuliyyətlərinizdən bəlkə qaça bilərsiniz. Amma məsuliyyətdən qaçmanın nəticələrindən qaça bilməzsiniz. "Faiz endiriminin TL-dəki dəyər itkisinə təsiri yoxdur" deyildiyi gün, valyuta məzənnələrinin verdiyi cavab".