2021-ci ilin yanvar-iyul dövründə Türkiyənin yaş meyvə-tərəvəz ixracı keçən ilin eyni dövrü ilə müqayisədə 20% artaraq 1 milyard 638 milyon dollar təşkil edib.

Marja Aralıq dənizi Yaş Meyvə Tərəvəz İxracatçıları Birliyinin məlumatlarına istinadən xəbər verir ki, bu dövrdə reallaşdırılan ixracın 32%-inə bərabər gələn 526 milyon 818 min dollarlıq qisimi Rusiyaya edilib.

Keçən ilin eyni dövründə Rusiyaya reallaşdırılan 463 milyon 508 min dollarlıq xarici satış, bu ilin eyni dövründə 14% artıb. Bu dövrdə Rusiyaya 705 min 182 ton yaş meyvə-tərəvəz satılıb.

İxracda Rusiyanın ardınca 186 milyon 496 min dollarla Almaniya, 141 milyon 120 min dollarla Rumıniya, 132 milyon 287 min dollarla İraq, 91 milyon 177 min dollarla Ukrayna gəlir.

Aralıq dənizi Yaş Meyvə Tərəvəz İxracatçıları Birliyi sədri  Nejdat Sin, Türkiyənin yaş meyvə tərəvəz ixracında əhəmiyyətli bir mövqedə olduğunu söyləyib.

İxracatın böyük qisiminin Rusiyaya edildiyini qeyd edən Sin deyib:

"Ən çox ixracı Rusiyaya edirik. Yeni bazarlar tapmağa çalışırıq. Məsələn Çin ilə bir dialoqumuz var. Bir ölkəyə ixrac edə bilməniz üçün iki ölkə arasında karantin razılaşmalarının bitmiş olması lazımdır. Uzaq Şərq bazarı bizim hədəf bazarlarımız arasındadır - Çin, İndoneziya, Sinqapur, Cənubi Koreya... Bu bazarlara da qismən bir ixracımız var. İşlərimiz davam edir. Davamlı əlaqədar nazirliklərimizlə, xaric nümayəndəliklərimizlə dialoq aparırıq".

Sin, yaş meyvə tərəvəz mövzusunda Türkiyədə ciddi bir istehsalın olduğunu vurğulayaraq belə davam edib:

"Heç bir zaman tək bir bazara və ölkəyə asılı qalmaq istəmirik. Dünyadakı vəziyyət dəyişə bilir, yəni siz bir bazara məhkum olduğunuzda geosiyasi inkişaflar, siyasi proseslərin təsirləri, çətinlikləri ola bilər. Hökumətin də yeni bazarlar tapmaq məsələsində dəstəyi var. Uzaq şərq, Balkan ölkələri, Avropa Birliyi daxil davamlı axtarış içərisindəyik".