"Azercell Telekom" MMC 2020-ci ili 104 milyon 166 min manat xalis mənfəət ilə başa vurub. Şirkət 2019-cu ili 101 milyon 178 min manat xalis mənfəət ilə bağlamışdı (2 milyon 988 min manat və ya 3% artıb). 

Marja.az şirkətin 31 dekabr 2020-ci il tarixində başa çatan il üzrə konsolidasiya edilmiş maliyyə hesabatlarına istinadən xəbər verir ki, Azercell-in əsas əmaəliyyat gəlirləri 2019-cu ildə 435 milyon 681 min manat ikən 2020-ci ildə 455 milyon 381 min manata yüksəlib. Beləliklə, 2020-ci ildə 2019-cu illə müqayisədə şirkətin əsas əməliyyat gəlirləri 19 milyon 700 min manat və ya 4,5% artıb.

2020-ci ildə "Azercell Telekom"un cəmi əməliyyat gəlirləri (maliyyə gəlirləri və digər gəlirlər daxil) 457 milyon 560 min manat, cəmi əməliyyat xərcləri 308 milyon 417 min manat, gəlirlər xərcləri üstələdiyindən əməliyyat mənfəəti 149 milyon 143 min manat təşkil edib. Şirkət əməliyyat mənfəətindən 44 milyon 977 min manat mənfəət vergisi ödəyib.

Müqayisə üçün qeyd edək ki, 2019-cu ildə  "Azercell Telekom"un cəmi əməliyyat gəlirləri 437 milyon 862 min manat, cəmi əməliyyat xərcləri 307 milyon 564 min manat, əməliyyat mənfəəti 130 milyon 298 min manat, ödədiyi mənfəət vergisi 29 milyon 120 min manat təşkil etmişdi. 

Ötən il Azercellin cəmi aktivləri 379 milyon 456 min manat və ya 32,6% azalaraq 783 milyon 385 min manata düşüb. Şirkət 2019-cu ilin sonunda 1 milyard 162 milyon 841 min manat cəmi aktivlərə malik idi. Aktivlərin kəskin azalmasının əsas  səbəbi pul vəsaitləri və pul vəsaitlərinin ekvivalentlərinin 2019-cu ilin sonundakı 304 milyon 839 min manatdan 10 milyon 708 min manata geriləməsidir. Şirkətin qısamüddətli investisiyaları da 217 milyon 600 min manatdan 102 milyon 170 min manata düşüb. 

Aktivlərin azalmasına, bölüşdürülməmiş mənfəətin 440 milyon 917 min manat azalaraq 993 milyon 854 min manatdan 552 milyon 937 min manata düşməsi təsir edib. 

Türkiyədə təsis edilmiş “Azertel Telekomünikasyon Yatırım Dış Ticaret A.Ş.” (“Azertel”) Azərbaycanda mobil xidmətlər operatoru olan “Azercell Telecom” MMC-nin yeganə təsisçisidir. “Azertel” nizamnamə kapitalının 51,3%-i Azərbaycan dövlətinə məxsus "AzInTelecom" şirkətinə, 42.2%-i “Cenay İletisim” şirkətinə və 6.5%-i Maltanın “FA Invest” şirkətinə  məxsusdur.

Həmçinin oxu

Azərbaycanın mobil operatorunun yarım milyard manatdan çox mənfəəti bölüşdürülüb