Neftə tələbat pandemiyadan əvvəlki səviyyəyə ən azı 1 il yarıma çatacaq - beynəlxalq qurum

2021-2022-ci illərdə cəmi 8,5 milyon barel artacaq günlük tələbat yalnız 2022-ci ilin sonunda 100 milyon barelə çata bilər...

Neftə tələbat pandemiyadan əvvəlki səviyyəyə ən azı 1 il yarıma çatacaq - beynəlxalq qurum

Beynəlxalq Enerji Agentliyi (IEA) bugün neft bazarı üzrə icmalının iyun 2021-ci il buraxılışını təqdim edib.

Marja xəbər verir ki, enerji bazarında ən mühüm məlumat mənbələrindən sayılan beynəlxalq qurum 2020-ci ildə rekord səviyyədə - günlük 8,6 milyon barel azalan qlobal neft tələbatının pandemiyadan əvvəlki səviyyəyə çatması üçün ən azı il yarım vaxt lazım olduğunu bildirib.

IEA 2021-ci ildə günlük tələbatın 5,4 milyon barel, 2022-ci ildə isə əlavə 3,1 milyon barel artacağını proqnozlaşdırır. 2022-ci ildə tələbatda günlük artımın 1,3 milyon bareli OECD üzvü olan ölkələrin, qalan 1,8 milyon bareli isə digər ölkələrin payına düşəcək. 2022-ci ilin sonuna günlük tələbatın ortalama 99,5 milyon barelə, maksimum həcmdə isə 100,6 milyon barelə çatacağı gözlənilir.

Artan tələbat isə öz növbəsində hasilat həcmini yüksəltməyi şərtləndirir. IEA 2021-ci ilin ikinci yarısında OPEC+ tərəfindən günlük hasilatın 800 min barel, quruma daxil olmayan ölkələr tərəfindən isə 710 min barel artırıla biləcəyini bildirir.

2022-ci ildə OPEC+ üzvü olmayan ölkələrin günlük hasilatı 700 min barel, ABŞ-ın hasilat həcmi 900 min barel artacaq. Belə olan halda, növbəti ilin ortalarında hasilatı 2 milyon barel artırmağı planlaşdıran OPEC+-un əlavə günlük 6,9 milyon barel ehtiyat istehsal həcmi qalır. Hətta İrana qarşı sanksiyalar ləğv olunsa və bu ölkə bazara əlavə 1,4 milyon barel günlük neft çıxarsa belə, OPEC+ üçün növbəti il ərzində hasilatı iri həcmdə artırmaq imkanı kifayət qədərdir.

11.06.2021 13:51

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az