OECD-dən bədbin nəticələr

OECD-dən bədbin nəticələr

G7 ölkələrinin iqtisadiyyatı daha zəif dirçəlir, pandemiyanın tez bitəcəyi ilə bağlı gözləntilər özünü doğrultmur. Birinci rübdə ÜDM cəmi 0,3% artıb

Özündə ABŞ, Kanada, Almaniya, Fransa, Böyük Britaniya, Yaponiya, Cənubi Koreya kimi iqtisadi nəhənglər də daxil olmaqla 37 ölkəni birləşdirən İqtisadi Əməkdaşlıq və İnkişaf Təşkilatı (OECD) 2021-ci ilin birinci rübünün ÜDM nəticələrini açıqlayıb.

Marja xəbər verir ki, təşkilat OECD coğrafiyasında iqtisadi inkişafın 2020-ci ilin son rübü (1%) ilə müqayisədə daha zəif getdiyini və cəmi 0,3% təşkil etdiyini bildirib. G7 ölkələr qrupunun ÜDM-i cəmi 0,4% artıb.

VTB-də yüksək depozit faizləri daha çox qazandırır

Almaniya (-1,7%), Böyük Britaniya (-1,5%) və Yaponiyada (-1,3%) ÜDM ötən ilin son rübü ilə müqayisədə azalıb. Xatırladaq ki, bu göstəricilər 2020-ci ilin sonlarında müvafiq olaraq 0,5%, 1,3% və 2,8% idi. İtaliyada (-0,4%) mənfi ÜDM həcmi ötən rüblə müqayisədə (-1,8%) azalsa da, ölkə hələ də iqtisadi artım tempini tuta bilmir. ABŞ və Kanadada ÜDM eyni faizlə artıb - 1,6% (ötən rüb ABŞ iqtisadiyyatı 2,3%, Kanada isə 1.1% artmışdı). 2020-ci ilin son rübündəki mənfi 1,4% göstəricidən sonra, Fransa cari ilin birinci rübündə özünə gəlməyə başlayıb: 0,4%.

2021-ci ilin birinci rübündəki iqtisadi aktivliyi pandemiyadan əvvəlki dövrlə (2019-cu ilin son rübü) müqayisə etdikdə, OECD regionunda ÜDM artımı hələ də -2,6%-lə geridədir. G7 ölkələrində ən iri iqtisadi tənəzzül Böyük Britaniyada (-8,7%), ən kiçik azalma isə ABŞ-da (-0,9%) qeydə alınıb.

OECD-nin hazırkı açıqlamaları və qlobal iqtisadi sistemin əsas hissəsini təşkil edən OECD üzvlərinin nəticələri dünya iqtisadiyyatının pandemiyadan sonra bu il özünə gələrək sürətlə artacağı barədə proqnozlara təkrar baxmağı zəruri edir. Mayın 31-də açıqlanacaq OECD İqtisadi İcmalında da 2021-ci il üzrə ÜDM artım proqnozuna düzəlişlər istisna olunmur.

21.05.2021 12:36

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az