Bugün Apple şirkətinin baş direktoru Tim Kuk ABŞ məhkəməsində ifadə verəcək.

Marja xəbər verir ki, məşhur Fortnite onlayn video oyununun sahibi Epic Games şirkətinin Apple-a qarşı qaldırdığı iddia üzrə bir aydır ki, davam edən məhkəmə prosesi yekunlaşmaq üzrədir. Məhkəmənin verəcəyi qərar 1 milyarddan artıq Iphone istifadəçisinə xidmət göstərən App Store ilə bağlı ciddi nəticələrə səbəb ola bilər.

Epic Games Apple-ı iPhone istifadəçiləri üçün müxtəlif oyun və tətbiqetmələr təklif edən proqramçıları bu təklifləri yalnız App Store-da yerləşdirməyə məcbur etməkdə, ödənişli proqramlara görə istifadəçilərin proqramçılara ödənişlərinin 30%-ni komissiya kimi tutmaqda, öz proqramlarında belə komissiya tətbiq etməyərək, haqsız rəqabət aparmaqda günahlandırır. Ötən il Apple Epic Games-in ən məşhur oyunu olan Fortnite-i App Storedan çıxarıb.

Epic iddiasını həm də Apple-ın öz qurucusu məşhur Stiv Cobsun 2008-ci ildə dediyi “App Store-un məqsədi gəlir əldə etmək deyil, istifadəçilər üçün daha maraqlı kontent təqdim etməkdir” fikirlərinə hörmət etməməsi və istifadəçiləri müxtəlif mexanizmlərlə App Store-da qalmağa məcbur etməsi ilə əsaslandırır. Apple isə cavabında Cobsun bu fikirlərinin öhdəlik yox, “pis proqnoz olduğunu” xatırladıb və App Store-un “iqtisadi möcüzə”yə çevrildiyini bildirib. Ötən il istifadəçilər bu “iqtisadi möcüzə”də 72 milyard dollar pul xərcləyib.

Məhkəmə prosesi bir sıra maraqlı çəkişmələrlə yadda qalıb. Epic Games-in dəvət etdiyi müstəqil ekspertlər, Apple-ın öyündüyü App Store-un 78% əməliyyat marjasının əsasən haqsız rəqabət üzərində qurulduğunu bldiriblər. Apple isə cavabında onları ələ salaraq, daha çox məlumat toplamağı məsləhət görüb: “Biz heç vaxt App Store-un marjasını hesablamırıq. Rəqəmləri deyəsən havadan götürmüsünüz. Yaxşı olar ki, Epis Games əvvəlcə Fortnite oyunundakı “lüt” bananları geyindirsin”...

Epic Games-in vəkillərinin cavabı da maraqlı olub: “Apple əvvəl izah etsin: niyə App Store-da oturan yeniyetmələr TikTok, Instagram və Redditdə ancaq “porno” və “BDSM” axtarır? Elementar əxlaq qaydaları və yaş həddinə görə məhdudiyyətləriniz hanı?”

Epic Games-in bugünkü məhkəmə prosesində Apple rəhbərinə hansı sualları verəcəyi də maraqlıdır....