Gümüş sürətlə bahalaşır - 74%

Gümüş sürətlə bahalaşır - 74%

Qızıl və misdən sonra daha bir metal dayanmadan dəyər qazanır.

Bahalı qızılla müqayisədə çox zaman diqqətdən kənarda qalan daha bir qiymətli metalın - gümüşün qiyməti sürətlə artır.

Marja birjalara və qiymətli metal bazarı göstəricilərinə istinadən xəbər verir ki, bir il öncə unsiyası 15,5 dollardan satılan gümüşün qiyməti son 12 ayda 74% bahalaşıb və hazırda 27 dollardan təklif olunur. Müqayisə üçün bildirək ki, qızılın qiyməti illik ifadədə cəmi 6,4% artıb.

Elektronika məhsullarından fotoaparatlara, zinət əşyalarından kompüterlərə, avtomobil sənayesindən monetalara qədər gümüş demək olar ki, bütün sahələrdə ən çox istifadə olunan metallardan biridir. Yaxşı elektrik keçiriciliyi və davamlılığı səbəbindən bu qiymətli metala tələbat yüksəkdir. Gümüş İnstitutunun məlumatlarına görə, gümüşün təchizatı 2021-ci ilin ilk rübündə 8% artaraq, 1,05 milyard unsiyaya, tələbat isə 15% yüksələrək, 1,03 milyard unsiyaya çatıb. Saxo Bank-ın Əmtəə Strategiyası bölməsinin rəhbəri Ole Hanson tələbin 50%-nin sənaye hesabına, qalan hissəsinin isə investorların bu metala iri yatırımları hesabına artdığını bildirir.

Doğrudur, gümüş 2011-ci ildə qeydə alınan bir unsiyaya görə rekord - 50 dollar qiymətinə hələ çatmayıb,lkain analitiklər qlobal iqtisadiyyatın bərpası və tələbin artması nəticəsində onun qiymətinin yüksəlməyə davam edəcəyinə əmindirlər. Citi Global Markets-in Əmtəələr üzrə Araşdırma direktoru Maks Leyton qeyd edir ki, ABŞ-da kredit faizlərinin aşağı həddə qalması nəticəsində investorlar ehtiyat vəsaitləri qızıl və gümüşdə saxlamağa daha çox üstünlük verir. Həmçinin, əsas hasilatçılar olan Çin və Hindistanda anbarlarda qalan hazır gümüş ehtiyatlarının azalması qiymət artımına təkan verəcək.

13.05.2021 19:47

📲 İndi
Marja.az-ın Telegram kanalına qoşulun və xəbərlər cibinizə gəlsin.

♦️ Ən son və vacib iqtisadi xəbərlər üçün Marja - Biznes və Maliyyə Xəbərləri Portalı
♦️ Ən mühüm xəbərlər üçün Marja.az