ABŞ-ın fast-food nəhəngi McDonalds 2021-ci ilin birinci rübünə dair nəticələri açıqlayıb.

Marja xəbər verir ki, şirkətin gəlirləri 9% artaraq, 5,12 milyard dollara (proqnoz - 5,03 milyard dollar), xalis mənfəəti 1,54 milyard dollara (səhm başına 2,05 dollar) çatıb. ABŞ-dakı satışlar 13,65% artıb.

Toyuq məhsullarına əsaslanan qidalar, o cümlədən Spicy Chicken McNuggets və Crispy Chicken Sandwich ən çox satılan və gəlir gətirən menyu olub.  

McDonalds-ın ABŞ-dakı rəhbəri Joe Erlinger birinci rübdə təkcə only sifariş əsaslı satışların 1,5 milyard dollar təşkil etdiyini bildirib. Beynəlxalq franşiza şəbəkələrində xüsusən Çin və Yaponiya hesabına artım 6,4%-ə çatıb. Ötən il pandemiya bu göstəricini 5,3% azaltmışdı. Növbəti ildə gəlirlərin 2019-cu ilin göstəricilərini də ötəcəyi proqnozlaşdırılır. Bunun üçün şirkət işçi qüvvəsini tam həcmdə təmin etmək məqsədilə əmək haqlarını da artırmağa hazırdır. ABŞ-da hazırda bir çox restoran şəbəkələri yenidən fəaliyyətini bərpa etsə də, pandemiya zamanı işdən ayrılan əməkdaşların yerini doldurmaqda çətinlik çəkirlər.

McDonaldsın əzəli rəqiblərindən KFC-nin ana şirkəti, Pizza Hut və Taco Bell kimi iri fast-food bizneslərini özündə cəmləşdirən Yum Brands da ötən gün birinci rübün nəticələrini açıqlayıb. Qrupun qlobal satışları ötən ilin müvafiq dövrü ilə müqayisədə 11%, o cümlədən KFC və Taco Bell-də 11%, Pizza Hut-da isə 7% artıb. Ümumi gəlirlər 1,486 milyard dollar təşkil edib (ötən ilin birinci rübündə bu rəqəm 1,263 milyard dollar idi). Xalis mənfəət ötən illə müqayisədə təxminən 4 dəfə artaraq, 326 milyon dollara çatıb.

KFC-nin gəlirləri 625 milyon dollar, əməliyyat mənfəəti 300 milyon dollar;

Pizza Hut-ın gəlirləri 251 milyon dollar, əməliyyat mənfəəti 102 milyon dollar;

Taco Bell-in gəlirləri 488 milyon dollar, əməliyyat mənfəəti 178 milyon dollar təşkil edib.

KFC rüb ərzində 50 ölkədə 409 yeni restoran açıb.