Tayvanın elektronika məhsulları istehsalçısı, bu sahədə sifarişlər üzrə dünya lideri Foxconn ABŞ-ın Viskonsin ştatında inşa edilməsi planlaşdırılan 10 milyard dollarlıq nəhəng istehsal müəssisəsi ilə bağlı planlarına ciddi dəyişiklik edib.

Marja xəbər verir ki, ötən gün ştat rəsmiləri ilə yeni razılaşmanın detallarını açıqlayan şirkət ilkin olaraq planlaşdırılan 10 milyard dollar əvəzinə 672 milyon dollar investisiya yatıracağını və iş yerlərinin sayının da 13 mindən 1500-ə qədər azaldılacağını bildirib.

Foxconn-Viskonsin anlaşması ilə bağlı məlumat hələ ilk dəfə 2017-ci ildə Ağ Ev tərəfindən çox böyük gözləntilərlə elan edilmiş, o zamankı ABŞ prezidenti Donald Tramp layihəni “dünyanın səkkizinci möcüzəsi” adlandıraraq, onun özünün elan etdiyi “Amerika hər şeydən öncə” proqramı çərçivəsində ABŞ texnologiya sektorunun necə canlanacağına dair ən bariz nümunə olması ilə öyünmüşdü. Foxconn və onun həmin zamankı sədri Terri Gou üçün bu investisiya imkanı Trampın Çinə qarşı elan etdiyi ticarət müharibəsi və Apple-ın Iphone markalı telefonlarının Amerika bazarına ixracı üçün Çində istehsalına yaranan təhlükələr fonunda göydəndüşmə fürsət idi.

Layihə çərçivəsində televizorlar və digər avadanlıqlar üçün ultramüasir ekranlar istehsalı müəssisəsinin qurulması və Viskonsinin texnoloji şirkətlər üçün yeni cəlbedici məkana çevrilməsi nəzərdə tutulurdu. Lakin sənaye ekspertləri, o cümlədən Foxconn rəsmilərinin bəziləri layihəyə skeptik yanaşaraq bildirirdilər ki, Viskonsin ətrafında nazik ekranların istehsalı üçün heç bir normal təchizat zənciri yoxdur. Bununla belə, 2019-cu ilin sonuna kimi layihənin yerləşəcəyi kənd üzrə 132 daşınmaz əmlak obyektinə 152 milyon dollar ödənmiş, əlavə olaraq köçürülmə xərcləri üçün 8 milyon dollara yaxın vəsait xərclənmişdi. Ümumilikdə Foxconn 2017-ci ildən bəri  mərhələlərlə Viskonsin ştatındakı müxtəlif sənaye və infrastruktur sahələrinə 900 milyon dollara yaxın sərmayə yatırıb.

Rəsmi adı Hon Hai Precision Industry Co olan Foxconn yeni razlaşmanın “dəyişən qlobal bazar şərtlərinə cavab olaraq daha çevik hərəkət imkanı yaratdığını” bildirib. Şirkət həmçinin “2017-ci ildəki danışıqlarda istifadə olunan ilkin proqnozların bazardakı gözlənilməz tərəddüdlər səbəbindən dəyişdiyin” vurğulayıb. Foxconn-un yeni sədri Liu Young-vey Viskonsindəki şəraitin elektromobillər üçün də böyük imkanlar vəd etdiyini açıqlayıb. Daha öncə Liu Viskonsinin ənənəvi ABŞ avtomobil sənayesin yaxın olduğundan burda elektromobillərin istehsalı üçün geniş imkanların mövcudluğunu, lakin hələ yekun qərar vermədiklərini və Meksikanın da seçimlər arasında olduğunu bildirmişdi.

Viskonsin ştatının qubernatoru Toni Evers “yeni razılaşmanın ştatın vergi ödəyiciləri üçün ümumilikdə 2,77 milyard dollar vəsaitə qənaət edəcəyini, iş yerlərinin yaradılması ilə bağlı öhdəliklərə əməl olunacağını və indiyə qədər layihənin dəstəklənməsi üçün yerli və ştat səviyyəsində yatırılmış 200 milyon dollarlıq investisiyaların hədər getməyəcəyini” bildirib.