“Expressbank” ASC 2021-ci ilin ilk rübünü 3 milyon 129 min manat xalis mənfəət ilə başa vurub. Maliyyə göstəriciləri Bankın maliyyə cəhətdən sağlam və dayanıqlı olduğunu göstərir.

Marja Bankın maliyyə göstəricilərinə istinadən xəbər verir ki, 2021-ci ilin yanvar-mart dövründə “Expressbank”ın cəmi cəmi əməliiyyat gəlirləri 12 milyon 633 min manat, cəmi əməliyyat xərcləri 9 milyon 475 min manat, gəlirlər xərcləri üstələdiyindən əməliyyat mənfəəti 3 milyon 158 min manat təşkil edib. Eyni zamanda, mümkün zərərlər üçün yaradılan məqsədli ehtiyatlardan azad olmuş 587 min manat mənfəətə əlavə edilib. Bank 3 milyon 745 min manat mənfəətindən 616 min manat mənfəət vergisi ödəyib. Beləliklə, “Expressbank” 2021-ci ilin ilk rübünü 3 milyon 129 min manat xalis mənfəət ilə bağlayıb.

Müqayisə üçün qeyd edək ki, 2020-ci ilin 1-ci rübündə “Expressbankı”ın cəm əməliyyat gəlirləri 13 milyon 918 min manat, cəmi əməliyyat xərcləri 10 milyon 910 min manat, əməliyyat mənfəəti 3 milyon 8 min manat təşkil etmişdi. Eyni zamanda ehtiyatdan azad olmuş 2 milyon 876 min manat mənfəətə əlavə edilmiş və mənfəət 5 milyon 884 min manata yüksəlmişdi. “Expressbankı” 27 min manat mənfəət vergisi ödədiyindən 2020-ci ilin ilk rübünü 5 milyon 858 min manat xalis mənfəət ilə bağlamışdı.

2020-ci ilin 1-ci rübü ilə müqayisədə 2021-ci ilin 1-ci rübündə “Expressbankı”ın əməliyyat xərclərinin azalması və nəticədə əməliyyat mənfəətin artması diqqəti çəlb edir. Bankın faiz xərcləri 2 milyon 415 min manatdan 1 milyon 529 min manata, qeyri-faiz xərcləri 8 milyon 494 min manatdan 7 milyon 946 min manata düşüb.

“Expressbankı”ın xalis mənfəətinin azalması mümkün zərərlər üçün yaradılan məqsədli ehtiyatlardan azad olan məbləğin azalması ilə əlaqədardır. Bankın cari fəaliyyətinin nəticəsini daha təmiz göstərən əməliyyat mənfəəti artıb.

31 Mart 2021-ci il tarixində “Expressbank” ASC 309 milyon 96 min manat cəmi aktivlərə, o cümlədən 208 milyon 228 min manat kredit portfelinə (müştərilərə verilmiş kreditlər) malik olub. Bank ötən ilin sonunda 313 milyon 448 min manat cəmi aktivlərə, o cümlədən 209 milyon 743 min manat kredit portfelinə malik idi.

İlk rübdə Expressbank"da fiziki şəxslərin (əhalinin) depozitləri 1 milyon 457 min manat artaraq 94 milyon 980 min manata çatıb.

“Expressbank” 31 Mart 2021-ci il tarixində 120 milyon 474 min manat məcmu kapitala malik olub.

Qeyd edək ki, "Expressbank" ASC-nin səhmdarları Xammədov Hikmət Hacəmməd oğlu (payı 19.5105%), Seyidov Hafiz Mirzağa oğlu(payı 9.7544%), AR Nəqliyyat, Rabitə və Yüksək Texnologiyalar Nazirliyi Yanında Dövlət Avtomobil Nəqliyyatı Xidməti ( payı 0.3794%), Azenco Group MMC (payı 48.7833%) və Enerqoservis MMC-dir ( payı 21.5724%).