“AS Group İnvestment” MMC şəhid ailələrinə bu bayram günlərində xüsusi dəstək, diqqət və qayğı göstərmək üçün Füzuli rayonuna yollanıb.

Şirkət rayonun Əhmədbəyli, Zobcuq 2 və Zobcuq 5 qəsəbələrindəki şəhid ailələrinə bayram sovqatı ilə qonaq olub. Mebel dəsti, məişət texnikası, ərzaq və digər zəruri əşyalarla onlara dəstək olub.

“AS Group İnvestment”in Füzulinin Əhmədbəyli kəndində ailəsilə görüşdüyü şəhid Nəsirov Elmir müddətdən atrıq hərbi qulluq xidmətçisi idi. Aprel döyüşlərində xüsusi qəhrəmanlıq göstərmişdi. Milli Ordumuzun 100 illik yubileyi münasibətilə xidmətlərinə görə “100 illik yubiley” medalı ilə təltif edilmişdir. Elmir sentyabrın 27 də Vətən Müharibəsində döyüşlərə qatılır. Düşmənin əsas müdafiə istehkamlarını yaranlardan olur. Elə Füzuli istiqamətində döyüşlərdə də şəhid olur. “Vətən uğrunda”, “Füzuli uğrunda” medallarıyla təltif olunur. Elmir arxasında iki körpə uşaq, və yaşlı valideynlərini buraxır.

“AS Group İnvestment”in Füzulinin Zobcuq 2 qəsəbəsində qonaq olduğu şəhid Paşayev Elgünün ailəsidir. Elgün Vətən Müharibəsi başladığı gün döyüşlərə qatılır, elə həmin gün Əddürrəhmanlı istiqamətində alovlu döyüşlərdə şəhid olur. O, ölümündən sonra ”Vətən uğrunda”, “Füzuli uğrunda” medallarıyla təltif edilir.      

 “AS Group İnvestment” Füzulinin Zobcuq 5 qəsəbəsində isə şəhid Salmanov İsmayılın yaşlı valideynlərilə görüşüb. Onlara zəruri məişət əşyaları və ərzaqla dəstək olmağa çalışıb. İsmayılın anası Yeganə xanım deyir ki, oğlu hələ uşaq ikən anasına deyərdi ki, böyüyüb Hadrudu azad edib səni öz torpağına aparacam. İsmayıl həqiqətən də sentyabrın 27 də Vətən Müharibəsində döyüşlərə qoşulur və Hadrudun azad edilməsində xüsusi qəhrəmanlıq göstərir. Gubalı, Zəngilan, Füzulinin azad edilməsində xüsusi xidmətləri olur İsmayılgilin taborunun. Mərdliyi və cəsurluğu ilə seçilən İsmayıl oktyabrın 24-də şəhid olur. Ölümündən sonra “Vətən uğrunda”, “Hadrudun azad edilməsi uğrunda”, “Füzulinin azad edilməsi uğrunda” medallarıyla təltif olunur

 “AS Group İnvestment” bu bayram günlərində qəhrəman şəhidlərimizin ailələrininin hər kəsdən daha çox diqqətə, qayğıya və dəstəyə ehtiyacı olduğunu düşünərək bu günləri məhz onlarla birlikdə keçirdi. Martın 20-də də şirkət Bakıda da şəhid Tağıyev Hüseynin və Qasımov Eltunun ailəsinə qonaq olmuş, onlara maddi, ərzaq və zəruri əşyalarla, həm də mənəvi dəstək olmağa çalışmışdır.   

 Qeyd edək ki, “AS Group İnvestment” bir müddət öncə Mingəçevir rayonunda Park Residence yaşayış binasında şəhid Niyazi İsgəndərovun ailəsinə 3 otaqlı mənzil hədiyyə etmişdir.   

Ümumiyyətlə sentyabrın 27-dən, ölkəmizin ən şanlı tarixi yazılmağa başladığı gündən “AS Group İnvestment” ordumuz, vətəndaşlarımız və dövlətimizə dəstək olmağı özünə borc bilir. Şirkət ön cəbhədə döyüşən əsgərlərimizə, ordumuza və müharibə ərzində düşmən zərbələri nəticəsində evləri dağıdılan, başqa kəndlərə, qəsəbələrə yerləşdirilən vətəndaşlarımıza istər ərzaq təchizatı, istərdə də, balansındakı texnikası ilə dəstək olur.

Bundan başqa  “AS Group İnvestment” şirkəti Vətən müharibəsində canlarından keçən və yaralanan qəhrəmanlarımızın ailələrinə dəstək olmaq məqsədilə yaradılan “Yaşat Fondu”na 150 min manat, işğaldan azad edilmiş ərazilərimizdə dayanıqlı məskunlaşma üçün müasir və layiqli həyatın təmin edilməsi, bütün sahələrdə quruculuq-bərpa və abadlıq işlərinin aparılması məqsədilə yaradılmış “Qarabağ Dirçəliş Fondu”na isə 300 min manat məbləğində ianə edib.