“Muğanbank” ASC 2020-ci ili 707 min manat xalis mənfəət ilə başa vurub. Halbuki, Bank 2019-cu ili  8 milyon 307  min manat xalis zərər ilə bağlamışdı. Zərər mümkün (gözlənilən) zərərlər üçün yaradılan məqsədli ehtiyatlara 10 milyon 275 min manat ayrılamsı ilə əlaqədar idi.

Marja Bankın maliyyə göstəricilərinə istinadən xəbər verir ki, “MuğanBank”ın 2019-cu ildə cəmi əməliyyat gəlirləri 45 milyon 857 min manat, cəmi əməliyyat xərcləri 48 milyon 76 min manat, xərclər gəlirləri üstələdiyindən əməliyyat zərəri 2 milyon 219 min manat təşkil edib. Eyni zamanda əvvəlki dövrlərdə mümkün zərərlər üçün yaradılan məqsədli ehtiyatlardan azad olmuş 2 milyon 926 min manat hesabına həm əməliyyat zərəri bağlanıb, həm də xalis mənfəət formalaşıb.

Müqayisə üçün qeyd edək ki, 2019-cu ildə "Muğanbank"ın cəmi əməliyyat gəlirləri 58 milyon 281 min manat, cəmi əməliyyat xərcləri 56 milyon 313 min manat, gəlirlər xərcləri üstələdiyindən əməliyyat mənfəəti 1 milyon 968 min manat təşkil etmişdi. Bank mümkün zərərlər üçün yaradılan məqsədli ehtiyatlara 10 milyon 275 min manat ayırdığından həmin ili 8 milyon 308 min manat xalis zərər ilə bağlamışdı.

2020-ci ildə ehtiyata vəsaitin ayrılmaması, əksinə ehtiyatın bir hissəsinin azad olması "Muğanbank"ın aktivlərinin keyfiyyətinin yaxşılaşdığına işarədir. Gözlənilən zərər reallaşmadığından ehtiyata ayırma dayanıb və yaradılmış ehtiyat da azad olmağa başlayıb.

İPOTEKA KREDİTLƏRİ PORTFELİ ARTIB

"Muğanbank" 2020-ci ilin sonunda 590 milyon 906 min manat cəmi aktivlərə, o cümlədən 335 milyon 946 min manat kredit portfelinə malik olub. Ötən il Bankın cəmi daşınmaz əmlak kreditləri (ipoteka) portfeli 8 milyon 324 min manat artaraq 111 milyon 46 min manata yüksəlib.  "Muğanbank"ın biznes kreditləri portfeli 200 milyon manatdan çoxdur.

31 Dekabr 2020-ci il tarixində "Muğanbank"da cəmi depozitlər 278 milyon 681 min manat, o cümlədən fiziki şəxslərin depozitləri 209 milyon 299 min manat təşkil edib. 

MƏCMU KAPİTALI 11 MİLYON MANATA YAXIN ARTIB

Ötən ilin sonunda "Muğanbank" 91 milyon 697 min manat məcmu kapitala malik olub. 31 Dekabr 2019-cu il tarixində “Muğanbank” 81 milyon 80 min manat məcmu kapitala malik idi.

2019-cu ilin sonuna olan məlumata görə, "Muğanbank"ın səhmdarları Elmir Mehdiyev (66,17%), Maqbet Mehdiyev (12,14%), Vəfa Vəliyeva (11,17%) və Fəridə Mehdiyevadır (10,52%).