Türkiyənin ən böyük birbaşa xarici investoru “SOCAR Turkey”in türk hava nəqliyyatı sektoru ilə birlikdə böyüyən markası “SOCAR Aviation” İzmirin Adnan Menderes hava limanında yanacaq təchizatını artıq öz yanacaqdoldurma məntəqəsindən həyata keçirəcək.

SOCAR-dan bildirilib ki, “SOCAR Turkey” Dövlət Hava Meydanları İşlətməsi (DHMİ) tərəfindən elan edilən tenderi “SOCAR Aviation” markası ilə qazandıqdan sonra istismara verilən Adnan Menderes yanacaqdoldurma məntəqəsi ilk yanacaq tədarükünü 2020-ci il dekabrın 5-də Türk Hava Yolları (THY) üçün həyata keçirib.

Adnan Menderes hava limanındakı məntəqəsi ilə birlikdə “SOCAR Turkey” ikinci hava nəqliyyatı yanacaqdoldurma məntəqəsini istismara verib. “SOCAR Aviation” şirkəti təmir və lisenziya proseslərinin ardınca Enerji Bazarlarını Tənzimləmə Təşkilatının (EPDK) lisenziyasını alan Adnan Menderes yanacaqdoldurma məntəqəsində 2 ədəd 750 kubmetrlik təyyarə yanacağı çəni yerləşir. Ümumilikdə 2500 kvadratmetr sahədə qurulmuş məntəqə mövcud infrastrukturu ilə illik 182 min kubmetrlik yanacaqdoldurma potensialına malikdir. Bu potensial hava limanının ümumi tələbatının 60 faizini qarşılayır. Bu çərçivədə ildə 9000 təyyarənin yanacaq təchizatı nəzərdə tutulur.

“SOCAR Aviation” 2013-cü ildə hava nəqliyyatı sektorunda fəaliyyətə başladıqdan sonra bir sıra hava limanının təyyarə yanacağı tədarükçüsünə çevrilib. Muğla Milas-Bodrum və İzmir Adnan Menderes hava limanları ilə yanaşı, İstanbul Sabiha Gökçen, Antalya, Muğla Dalaman, Ankara Esenboğa, Trabzon, Samsun Çarşamba, Adana, İstanbul IGA hava limanlarının da yanacaq ehtiyacını qarşılayır. Yanacaqdoldurma sahəsində investisiyalarını davam etdirən “SOCAR Aviation” gələcəkdə yeni yanacaqdoldurma komplekslərini də istismara verməyi planlaşdırır. “SOCAR Turkey”in enerji zəncirinin bütün həlqələrini ehtiva edən inteqrasiyalı strukturu sayəsində “Star” neft emalı zavodunun (NEZ) təyyarə yanacağı istehsal gücünün üstünlüyünə də sahib olan “SOCAR Aviation” türk hava nəqliyyatı sektoruna ən yaxşı şəkildə xidmət vermək üçün işlərini davam etdirir.