Bank xidmətlərinin hər kəs üçün əlçatan olmasından ötrü Azərbaycan Beynəlxalq Bankı daha bir addım atıb. Bank ödənişsiz “Baza bank xidmətləri paketi”ni istifadəyə verib. Bu, aşağı gəlirli əhali qrupları üçün düşünülmüş universal xidmətlər paketidir.

Belə bir tədbir “2018-2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”nda da nəzərdə tutulub. Burada əsas məqsəd ölkəmizdə elektron ödəniş xidmətlərindən istifadənin genişləndirilməsi, bütün vətəndaşların bu imkanlardan faydalana bilməsidir.

“Baza bank xidmətləri paketi” aşağı gəlirli əhali qrupuna Azərbaycan Beynəlxalq Bankının əksər xidmətlərindən ödənişsiz, bir çox xidmətlərindən isə güzəştli şərtlərlə istifadə imkanı verir. Belə ki, müştərilər milli valyutada cari hesabı ödənişsiz açdıra, cari hesaba bağlı əməliyyatların aparılmasına imkan verən bir ədəd debet kartını da ödənişsiz ala bilərlər.

Müştərilərin bankın IBA Mobile və İnternet Bank xidmətinə qoşulması, ay ərzində cari hesaba yaşayış minimumu həcmində vəsaitin mədaxil edilməsi, ay ərzində bankın ölkədaxili ekvayer şəbəkəsində yaşayış minimumu həcmində nağdlaşma əməliyyatının aparılması da ödənişsizdir. Bundan başqa, SMS məlumatlandırma sisteminə qoşulma, cari hesab üzrə aparılmış əməliyyatlar üzrə elektron çıxarışın təqdim edilməsi, ay ərzində cari hesab vasitəsilə yaşayış minimumu həcmində ölkədaxili köçürmə əməliyyatının aparılması üçün də müştəridən heç bir ödəniş tələb olunmur.

Qeyd edək ki, maliyyə xidmətlərinə çıxış imkanı olmayan və ya aşağı səviyyədə olan, habelə belə bir imkanı olsa da, xidmətlərin cəlbedici olmaması səbəbindən onlardan istifadə etməyən əhali qrupu üçün bu cür “Baza bank xidmətləri paketi”nin tətbiqi beynəlxalq təcrübədə də geniş yayılıb. Azərbaycan Beynəlxalq Bankının atdığı bu addım ölkəmizdə maliyyə inklüzivliyinin gücləndirilməsinə daha bir dəstək olacaq.

Müasir dövlət bankı olan Azərbaycan Beynəlxalq Bankının universal və faydalı məhsul və xidmətləri barədə məlumatları bankın 39 filial və 37 şöbəsindən, www.ibar.az internet səhifəsindən, 937 nömrəli Məlumat Mərkəzindən, həmçinin rəsmi Facebook səhifəsindən əldə etmək olar.