40-dan çox ölkə Böyük Britaniyaya uçuşları dayandırıb.

Krallıqda koronavirusun yeni növünün yayılmasından sonra Fransa, Belçika, Almaniya, Danimarka, Avstriya, İtaliya, Bolqarıstan, Çexiya , Rumınıya, İsveç, Estoniya, Litva, Latviya , Kanada, Küveyt, Səudiyyə Ərəbistanı, Salvador, Rusiya və Hollandiya kimi ölkələr Britaniyaya olan uçuşları dayandırıb. Ümumdünya Səhiyyə Təşkilatı (ÜST) Avropadakı üzv ölkələrə tədbirləri artırmağı məsləhət görüb.

Fransa Britaniya ilə sərhədini 48 saatlıq bağlayıb, bu müddət ərzində uçuşlardan başqa, Dover limanından da heç bir yük maşını və ya gəmi çıxa bilməz.

Baş nazir Boris Conson, Fransa prezidenti Emmanuel Makron ilə aralarında danışıq olduğunu və hər iki tərəfin də problemi ən qısa müddətdə həll etmək istədiklərini söyləyib. Həmçinin hökumətin fövqəladə hallar komitəsinin iclasına rəhbərlik edən Baş nazir ticarət axınında heç bir problemin yaşanmaması üçün çalışdıqlarını bildirib.

Qeyd edək ki, yeni mutasiya və ölkənin cənub-şərqində və Londonda sürətlə yayılıb. Yeni növ koronavirusun əvvəlkindən 70 faiz daha yoluxucu olduğu müəyyənləşib.

Britaniyada koronavirusa yoluxanların sayı 2 milyonu ötüb

Böyük Britaniyada koronavirusa yoluxanların sayı 2 milyonu ötüb. Yerli KİV-lər xəbər verir ki, ötən gün virusdan 534 nəfər həyatını itirib və bununla da ölənlərin sayı 70 minə çatıb.

Ölkədə müşahidə olunan, mutasiyaya uğramış yeni koronavirus növünün 70 faiz daha yoluxucu olduğu müəyyənləşib.

Virusun yayılmasının qarşısını almaq üçün hökumət tərəfindən karantin qaydaları daha da sərtləşdirilib. Qida satışı olmayan bütün mağazalar, idman yerləri və restoranların fəaliyyəti dayandırılıb. Milad bayramı ərəfəsində ailələrin bir-biri ilə görüşməsinə verilən icazələr ləğv edilib. Vətəndaşlardan daha diqqətli olmaları tələb olunur.

Həmçinin bir çox ölkələr Krallığa olan uçuşları dayandırıb.

Azərtac