(®️) Haqqımız olan Qarabağ uğurunda döyüşlərin başladığı gündən bu günə kimi Azərbaycanda mobil telefon, elektronika və məişət texnikası satışı üzrə fəaliyyət göstərən ən böyük mağaza şəbəkələrindən biri “İrşad Electronics” müzəffər ordumuza dəstək olmağa davam edir.

Şirkət rəhbərliyi və komandası bu dəfə döyüşlərdə iştirak edən yaralı hərbçilərimizin eşidəcəyi xoş xəbərlərə vəsilə olmaq niyyəti ilə 100 nəfərə mobil telefon hədiyyə etdi.

Hərbçilərin döyüş zamanı itirdikləri, yararsız vəziyyətə düşən telefonlarının olmaması səbəbindən ailəsi ilə əlaqə saxlamaq imkanları məhdudlaşırdı. Bu məhdudiyyəti aradan qaldırmaq üçün şirkət tərəfindən belə bir təşəbbüs irəli sürüldü.  Bakı şəhərində müxtəlif xəstəxanalarda ümumilikdə 100 hərbçi ilə görüşən “İrşad Electronics” şirkətinin İdarə Heyətinin Üzvü və Marketinq departamentinin rəhbəri Əli Bədəlov bildirdi ki, yaralı hərbçilərimizlə görüşdə onların ruh yüksəkliyinə qibtə etməmək qeyri mümkündür: “Biz ötən gün cəbhə bölgəsinə əsgərlərə lazım olan ləvazimatları aparanda orada da eyni şəkildə hərbçilərimiz olduqca məğrur şəkildə, qələbə adını tutaraq torpaqlarımız uğrunda döyüşə gedirdilər. Eyni şəkildə bu ruh yüksəkliyini yaralı hərbçilərimizdə də gördük. Ümid edirik cismən burada, amma qəlbi döyüşdə, döyüş yoldaşlarının yanında olan hərbçilərimiz zəfər xəbəri ilə tez zamanda ayağa qalxarlar.”

Qeyd edək ki, ötən günlərdə şirkət torpaqlarımız uğrunda döyüşən hərbçilərimizin və səfərbər olan hərbi vəzifəli müştərilərin kredit ödənişlərini də artıq dondurub. Qarabağda gedən zəfər döyüşləri müddətində şəhid olan və yaralanan hərbçilərin kredit borclarını tam siləcəyi xəbərini verib. Həmçinin Qarabağ uğrunda döyüşlərdə yaralanan hərbçilərimizin  və səfərbər olunan hərbi vəzifəlilərin ailələrinə dəstək olmaq məqsədilə 100 ailəyə 30 000 manat həcmində birdəfəlik maddi yardım ayırıb. Ordumuza dəstək olmaq məqsədi ilə isə “İrşad Electronics” Azərbaycan Respublikasının Silahlı Qüvvələrə Yardım Fonduna da 50.000 manat köçürüb və cəbhə bölgəsində çətin dağlıq şəraitdə xidmət edən hərbiçilərimizə 20.000 manat dəyərində isti geyim yola salıb.

“İrşad Electronics” şirkəti olaraq ordumuzun zəfər yürüşləri ilə fəxr edir və döyüşlərdə ordumuza qoşulan əməkdaşları da daxil olmaqla bütün hərbçilərin sağ salamat, şad xəbərlə qayıtmalarını arzulayır.