Azərbaycanda mobil telefon, elektronika və məişət texnikası satışı üzrə fəaliyyət göstərən ən böyük mağaza şəbəkələrindən biri “İrşad Electronics” Qarabağ uğrunda gedən döyüşlərdə ordumuza dəstək naminə həyata keçirdiyi tədbirləri davam etdirir. Şirkət bu dəfə torpaqlarımızın bütövlüyü uğrunda səfərbər olunan və cəbhə bölgəsində çətin dağlıq şəraitdə xidmət edən hərbiçilərimizə 20.000 manat dəyərində isti geyim yola salıb.

Şirkətdə Satış və Xidmət Departamentinin direktoru Aris Şıxəliyev bildirib ki, “Arxa cəbhə olaraq bizim üzərimizə düşən vəzifə ön cəbhədəkilərə əlimizdən gələn dəstəyi verməkdir. Onlar döyüş üçün səfərbərdilər, biz də bir millət olaraq orduya dəstək üçün səfərbər olmalıyıq. Gücümüzü birləşdirməyin zamanı bu gündür.” Şirkət tərəfindən göndərilən yardım 03 oktyabr tarixində səhər saatlarında yola düşüb.

Qeyd edək ki, ötən günlərdə şirkət torpaqlarımız uğrunda döyüşən hərbçilərimizin və səfərbər olan hərbi vəzifəli müştərilərin kredit ödənişlərini də artıq dondurub. Həmçinin Qarabağ uğrunda döyüşlərə səfərbər olunan hərbi vəzifəlilərin ailələrinə dəstək olmaq məqsədilə 100 ailəyə 30 000 manat həcmində birdəfəlik maddi yardım ayırıb.

Ordumuza dəstək olmaq məqsədi ilə İrşad Electronics Azərbaycan Respublikasının Silahlı Qüvvələrə Yardım Fonduna da 50.000 manat köçürüb. Bundan əlavə Qarabağda gedən zəfər döyüşləri müddətində şəhid olan və yaralanan hərbçilərin kredit borclarını tam siləcəyi xəbərini verib.

İrşad Electronics şirkəti olaraq ordumuzun zəfər yürüşləri ilə fəxr edir və döyüşlərdə ordumuza qoşulan əməkdaşları da daxil olmaqla bütün hərbçilərin sağ salamat, şad xəbərlə qayıtmalarını arzulayır.

Artıq 20 ildir Azərbaycanda fəaliyyət göstərən “İrşad Electronics” müştərilərə məhsul çeşidi təklifini və xidmət səviyyəsini artırmaq məqsədilə portfelində olan brendlərin, məhsul modellərinin sayını genişləndirib. Hazırda, Azərbaycanda 33 mağaza və təmir xidmət mərkəzi fəaliyyət göstərir ki, onlardan 22-i Bakıda, 1-i Masazırda, 1-i Xırdalanda, digərləri isə regionlarda yerləşir.