"Az-Granata"nın zərəri azalıb

"Az-Granata"nın zərəri azalıb

"Az-Granata"nın gəlirləri və balans mənfəəti artsa da, əvvəlki illərin zərərləri ilə əlaqədar olaraq illik zərəri 10 milyon 579 min manatdan 9 milyon 898 min manata düşüb.

VTB-də minimal faiz dərəcəsi ilə nağd kredit 10.49%-dən

Azərbaycanın sipirtli və siprtsiz içkilər istehsalçısı "Az-Granata" MMC 2019-cu ildə satışdan 47 milyon 17 min manat gəlir əldə edib. 2018-ci ilə müqayisədə Şirkətin gəlirləri 11 milyon 791 min manat və ya 33,5% artıb. 2018-ci ildə "Az-Granata" satışdan 35 milyon 225 min manat gəlir əldə etmişdi.

Marja "Az-Granata"nın maliyyə hesabatına istinadən xəbər verir ki, ötən il 47 milyon 17 min manat cəmi gəlirə qarşı cəmi xərclər 43 milyon 367 min manat olmuşdur. Nəticədə şirkət maliyyə ilini 3 milyon 650 min manat balans mənfəəti ilə başa vurub. Lakin əvvəlki illərin (2014, 2015) zərərləri nəzərə alınmaqla il 9 milyon 898 min manat zərərlə yekunlaşmışdır.

Müqayisə üçün qeyd edək ki, 2018-ci ildə "Az-Granata"nın cəmi gəlirləri 35 milyon 225 min manat, cəmi xərcləri 34 milyon 634 min manat təşkil etmiş, nəticədə 591 min manat balans mənfəəti formalaşmışdı. Lakin əvvəlki illərin (2013-2017) zərərləri nəzərə alınmaqla il 10 milyon 579 min manat zərər ilə yekunlaşmışdı.

Ötən il "Az-Granata"nın cəmi aktivləri 41 milyon 489 min manat artaraq 01 Yanvar 2020-ci il tarixində 141 milyon 124 min manat təşkil edib.

Cəmi aktivlərin artması torpaq, tikili, avadanlıqlar, ehtiyatlar və debitor borcların artması ilə əlaqədardır. Debitor borcların (müəssisəsnin alacağı) ötən il 2 dəfə artaraq 8 milyon 464 min manatdan 17 milyon 254 min manata yüksəlməsi diqqəti çəkir.

2011-ci ildən fəaliyyət göstərən "Az-Granata" Cənubi Qafqazın ən böyük meyvə şirəsi və şərab istehsalçılarından biridir.