2019-cu ildə Azərbaycan Respublikası Dövlət Neft Fondunun (ARDNF) ümumi investisiya portfelinin gəlirliliyi 5,29% təşkil etmişdir. Fond 2018-ci ili 0,35% gəlirlilik ilə başa vurmuşdu.

Marja Fondun illik hesabatına istinadən xəbər verir ki, 2019-cu ildə sabit gəlirli qiymətli kağızlar portfeli üzrə illik gəlirlilik 3,02%, səhm portfeli (özəl səhmlər daxil olmaqla) üzrə 21,50%, daşınmaz əmlak portfeli üzrə isə 7,35% təşkil etmişdir. İnvestisiya portfelinin toplam gəlirliliyinə (5,29%) sabit gəlirli qiymətli kağızlar portfelinin töhfəsi 2,21%, səhm (özəl səhmlər daxil olmaqla) və daşınmaz əmlak portfellərinin töhfəsi isə müvafiq olaraq 2,67% və 0,41% təşkil etmişdir.

2019-cu ilin dekabr ayının nəticələrinə əsasən investisiya portfelinin 10,7%-i xarici menecerlər tərəfindən idarə edilir.

ARDNF-nin vəsaitlərinin bir hissəsi aşağıda qeyd edilən xarici menecerlər tərəfindən idarə olunur:

Sabit gəlirli qiymətli kağızlar üzrə:

- Dünya Bankı – ARDNF-nin aktivlərinin 240 milyon ABŞ dollarını (ARDNF-nin investisiya portfelinin 0,5%- ni) idarə edir;

-“DWS International” – ARDNF-nin aktivlərinin 111 milyon ABŞ dollarını (ARDNF-nin investisiya portfelinin 0,3%-ni) idarə edir.

Səhmlər üzrə:

- “UBS Asset Management” – ARDNF-nin aktivlərinin 1 775 milyon ABŞ dollarını (ARDNF-nin investisiya portfelinin 4,1%-ni) idarə edir;

-“State Street Global Advisors” (SSgA) – ARDNF-nin aktivlərinin 1 409 milyon ABŞ dollarını (ARDNF-nin investisiya portfelinin 3,3%-ni) idarə edir;

- “Mellon Investments Corporation” – ARDNF-nin investisiya portfelinin 390 milyon ABŞ dollarını (ARDNF-nin investisiya portfelinin 0,9%-ni) idarə edir;

-“BlackRock Investment Management” – ARDNF-nin investisiya portfelinin 370 milyon ABŞ dollarını (ARDNF-nin aktivlərinin 0,8%-ni) idarə edir;

-“Sumitomo Mitsui Trust International” (Sumitomo) – ARDNF-nin investisiya portfelinin 345 milyon ABŞ dollarını (ARDNF-nin aktivlərinin 0,8%-ni) idarə edir.

2019-cu il İnvestisiya siyasətinə əsasən investisiya portfeli aşağıdakı altportfellərə bölünmüşdür:

- 55% - borc öhdəlikləri və pul bazarları alətləri (aşağı uzaqlaşma intervalı maksimum 5 faiz olmaqla);

- 25% - səhm (maksimum 5 faizə qədəri səhmlərə və kredit reytinqinə malik olmayan borc öhdəliklərinə investisiya qoyan pay fondları olmaqla);

- 10% - daşınmaz əmlak (yuxarı uzaqlaşma intervalı maksimum 2 faiz olmaqla);

- 10% - qızıl (yuxarı uzaqlaşma intervalı maksimum 3 faiz olmaqla).

2019-cu ilin dekabr ayına olan vəsaitlərin strateji bölgüsünə əsasən ARDNF-nin investisiya portfelinin 68,7%-i sabit gəlirli qiymətli kağızlar və pul bazarı alətlərindən, 14,1%, 11,4%, 5,8%-i isə müvafiq olaraq səhmlər, qızıl və daşınmaz əmlak investisiyalarından ibarət olmuşdur.