Texnoloji yeniliklərə və insan kapitalına daima yatırım etməsi ilə seçilən “Qardaşlar mebel” şirkətinin satışları ölkədə pandemiya olmasına baxmayaraq artıb.

Yeniliklərə dəstəyi ilə seçilən şirkətin rəhbəri Əli Mirzəyev pandemiya səbəbi ilə dünyada və ölkədə baş verənlərin mebel sektoruna müsbət təsir göstərəcəyinin gözlənilən olduğunu söylədi.

“Belə bir vəziyyətdə bir çox şirkətlərin öz əməkdaşlarına evdən işləməyə icazə verəcəyini təxmin etmək o qədər də çətin deyildi. Biz yaxşı anlayırdıq ki, şirkətlərin belə bir addım atmaları evlərdə kiçik ofis güşələrinin yaranmasına təkan verəcək. Şirkətlərdə çalışan əməkdaşların iş masalarının evlərə daşınması bahalı proses olduğundan, həmçinin bu proses virusun yayılması riskini artıracağı üçün ofis mebellərinə olan tələbatın artması bizim üçün gözlənilən idi. Pandemiya ilə əlaqədar ölkədə fəaliyyət göstərən mebel sexlərinin operativ qərargahın təyin etdiyi qaydalar çərçivəsində işləyə bilməməsi də sifarişlərin böyük hissəsini ixtisaslaşmış şirkətlərə yönəltdi. Biz çox şadıq ki, krizis kommunikasiya planını doğru qurmaqla, pandemiya dövründə satışlarımızı artıra bildik.”

“EV OFİSİ ƏVƏZ EDƏ BİLMİR”

Şirkət rəhbəri pandemiya dövrünün onlar üçün ofis mebellərinin istehsalı istiqamətində yeni mərhələ açdığını vurğuladı:

 “Müştərilərin istər internet, istərsə də telefon üzərindən verdiyi sifarişləri analiz etməklə yeni növ insan vərdişlərinin şahidi olduq. İnsanlar anladılar ki, evdə gündəlik istifadə üçün nəzərdə tutulan masalar, iş yerlərində olan ofis masalarını əvəz edə bilmir. Bu həmçinin gördüklərin işin keyfiyyətinə də ciddi təsir edir. Düşünürəm ki, müştərilərdən əldə etdiyimiz bütün bu məlumatlar bizə daha da praktik və funksional ofis mebelləri istehsal etməyimizə təkan verəcək.”

SMART OFİS MEBELİNƏ MARAQ ARTIB

Əli Mirzəyev həmçinin müştərilərin smart ofis mebelinə olan marağının artdığını da söylədi: “Müştərilər yerli şirkətin belə bir innovativ mebel istehsal etməsi fikrini maraqla qarşıladılar. Bu istiqamətdə də artıq sifarişlərin icrasına başlamışıq. Həm sağlamlıq, həm gündəlik lazım olan texnoloji elementlərin bir arada olduğu ofis mebelinə sahib olmaq indiki dövr üçün olduqca vacibdir.”

MEBELLƏRİNİ AMERİKA BAZARINA ÇIXARACAQ

Qeyd edək ki, “Qardaşlar mebel" şirkəti Azərbaycanda ilk smart mebel istehsalçısıdır. Şirkət həmçinin bu ilin sonuna kimi istehsal etdiyi mebelləri Amerika bazarında çıxarmağı planlaşdırır.