"Hazırda problemli bank var?" sualına rəsmi cavab verildi

"Hazırda problemli bank var?" sualına rəsmi cavab verildi

"Hazırda problemli bank var?" sualına rəsmi cavab verildi

4 bankın lisenziyası ləğv edildikdən sonra, Mərkəzi Bankın sədri Elman Rüstəmov, "Hazırda Azərbaycanda maliyyə vəziyyəti pisləşmiş, kapitalı minimal tələbdən aşağı düşmüş, problemli bank var?" sualına “Biz hazırda maliyyə vəziyyəti problemli olan başqa bank tanımırıq” şəkilində cavab verib.

Marja-nın məlumatına görə, bu gün keçirdiyi mətbuat konfransında Mərkəzi Bankın sədri Elman Rüstəmov bildirib ki, bundan sonra Mərkəzi Bank kommersiya banklarına ciddi nəzarət edəcək, tez-tez yoxlamalar həyata keçirəcəkdir:

“Bu proses dinamik prosesdir. Biz yoxlamalarımızı mütəmadi aparacağıq, əgər məlumat olarsa Mərkəzi Bank ictimaiyyətli məlumatlandıracaqdır”.

Elman Rüstəmov qeyd edib ki, bağlanan 4 bank təqdim etdiyi prudensial və statistik hesabatları davamlı olaraq təhrif etsələr də hazırda fəaliyyətdə olan bankların maliyyə hesabatlarına “həlledici dərəcədə” inanmaq olar:

“Biz bank sektorunu tam şəkildə yoxlayıb başa çatdırmamışıq. İlk növbədə bunu demək istəyirəm. İlkin olaraq bankların kapitallarının qiymətləndirilməsi prosesi həyata keçirilmişdir. Əgər bu qiymətləndirmə olmasaydı 4 bankın siyahısı daha böyük ola bilərdi. Aydındır məntiqi olaraq? Yəni biz bankların portfellərinin ilkin qiymətləndirilməsini həyata keçirmişik və hesab edirəm ki, bu gün həlledici dərəcədə bankların hesabatlarına, çap olunan hesabatlarına inanmaq olar. Təbii ki, son dəqiqləşmələr mümkündür, amma mən düşünmürəm ki, bu dəqiqləşmələr, o dərəcəyə çatsın ki, bank kapitalını itirib, yox. Ola bilər 1-2% kənarlaşma olsun. Bu həmişə mümkün ola bilər”.

Xəbər verdiyimiz kimi, Mərkəzi Bank AtaBank, Amrahbank, AgBank və NBC Bank-ın lisenziyalarını ləğv edib.