Azərbaycanda əhalinin borc yükünün sərəncamda qalan gəlirlərinə nisbəti 2026-cı ilin birinci yarısının sonunda 18,7%-ə yüksəlib. Bu göstərici 2025-ci ilin sonu ilə müqayisədə 0,3 faiz bəndi artıb və son illərin ən yüksək səviyyəsinə çatıb.

Marja.az xəbər verir ki, bu barədə Azərbaycan Mərkəzi Bankının (AMB) 2026-cı ilin birinci yarısının yekunları üzrə Maliyyə Sabitliyi Hesabatında bildirilir.

Hesabatda qeyd olunur ki, əhalinin sərəncamında qalan gəlirlər artsa da, borc yükünün həmin gəlirlərdəki payında yüksəliş müşahidə edilib.

Əhalinin borc yükü son 5 ildə davamlı artıb

Mərkəzi Bankın məlumatlarına əsasən, əhalinin borc yükünün sərəncamda qalan gəlirlərinə nisbəti 2021-ci ildə 13,9% təşkil etdiyi halda, 2022-ci ildə 14,5%-ə, 2023-cü ildə 15,8%-ə, 2024-cü ildə 18%-ə, 2025-ci ildə isə 18,4%-ə yüksəlib.

2026-cı ilin birinci yarısının sonunda bu göstərici 18,7%-ə çatıb. Beləliklə, əhalinin borc yükünün gəlirlərinə nisbəti 2021-ci illə müqayisədə 4,8 faiz bəndi yüksəlib.

Əhalinin sərəncamında qalan aylıq gəlirləri 15,4 min manata çatıb

Mərkəzi Bankın təqdim etdiyi qrafikə əsasən, iqtisadi fəal əhali üzrə adambaşına sərəncamda qalan illik gəlir 2021-ci ildə 9,7 min manat, 2022-ci ildə 11,6 min manat, 2023-cü ildə 13,2 min manat, 2024-cü ildə 13,8 min manat, 2025-ci ildə 14,8 min manat təşkil edib. 2026-cı ilin birinci yarısının yekunları üzrə bu göstərici 15,4 min manata yüksəlib. Beləliklə, 2021-ci illə müqayisədə iqtisadi fəal əhali üzrə adambaşına sərəncamda qalan gəlir 5,7 min manat və ya 58,8% artıb.

Gəlirlərin artmasına baxmayaraq, borc yükü yüksəlir

Maliyyə Sabitliyi Hesabatının göstəriciləri əhalinin sərəncamda qalan gəlirlərinin artması ilə yanaşı, borc yükünün də yüksəldiyini göstərir. 2021–2026-cı illər ərzində adambaşına sərəncamda qalan gəlir 58,8% artdığı halda, borc yükünün gəlirlərə nisbəti 13,9%-dən 18,7%-ə çatıb. Bu dinamika əhalinin borc öhdəliklərinin sərəncamda qalan gəlirlərinə nisbətən artdığını göstərir.

Mərkəzi Bank əhalinin borc yükünün dinamikasının diqqət mərkəzində saxlanıldığını bildirir.

Hər gün yeni vakansiyalar - AzVak.az-da