Azərbaycan Mərkəzi Bankı (AMB) 2019-cu ili 69,2 milyon manat mənfəətlə başa vurub. Halbuki, qurum 2018-ci ildən 60,3 milyon manat zərərlə çıxmışdı.

Öötən il AMB-nin faiz gəlirləri 231,7 milyon manat (əvvəlki ilə nisbətən 15,1% çox), faiz xərcləri 234,3 milyon manat (22,2% az), haqq və komissiya gəlirləri 17 milyon manat (3,6% çox), haqq və komissiya xərcləri 4,3 milyon manat (9,6% az), ticarət qiymətli kağızlarının yenidən qiymətləndirilməsi üzrə xalis gəliri 12,4 milyon manat (əvvəlki il zərər olub), satış üçün mövcud olan qiymətli kağızların realizasiyası üzrə xalis gəliri 65,4 milyon manat (38% çox), törəmə maliyyə alətlərinin yenidən qiymətləndirilməsi üzrə xalis gəliri 5,1 milyon manat (78,1% az), likvidlik fondlarının vəsaitlərinin yenidən qiymətləndirilməsi üzrə xalis gəliri 20,9 milyon manat (83,4% çox), xarici valyuta mövqeyinin yenidən qiymətləndirilməsi üzrə zərəri 2,8 milyon manat (94,6% az), qiymətli kağızların dəyərsizləşməsi üzrə zərəri 39 min manat (74,5% az), xarici valyuta əməliyyatları üzrə xalis gəliri 748 min manat (28,7% az), sair əməliyyat gəliri 30,5 milyon manat (3,5 dəfə çox), sair xərcləri 48,3 milyon manat (əvvəlki il olmayıb), dəyərsizləşmə üzrə gəliri 29,6 milyon manat (50,9% az), inzibati və sair əməliyyat xərcləri isə 54,4 milyon manat (17,7% az) təşkil edib. 

AKTİVLƏRİ 3% ARTIB

Bu il yanvarın 1-nə Azərbaycan Mərkəzi Bankının (AMB) aktivləri 22 623,8 milyon manat təşkil edib. Bu, ötən il yanvarın 1-i ilə müqayisədə 2,5% çoxdur.

AMB-nin aktivlərinin 17 489,5 milyon manatını borc qiymətli kağızları (illik müqayisədə 7% çox), 4 309,3 milyon manatını pul vəsaitləri və onların ekvivalentləri (illik müqayisədə 12% az), 359,9 milyon manatını Beynəlxalq Valyuta Fondu ilə hesablaşmalar (0,5% az), 271 milyon manatını isə banklara verilmiş kreditlər (12,8% az) təşkil edib.

2019-cu ildə AMB-nin öhdəlikləri 13,8% artaraq 20 047,4 milyon manat, o cümlədən dövriyyədə olan əskinaslar və sikkələri 24,4% artaraq 10 405,5 milyon manat, rezident bankların qısamüddətli depozitləri 9% azalaraq 3 075,8 milyon manat, hökumət idarələri qarşısında öhdəlikləri 69% artaraq 2 734,4 milyon manat, kredit təşkilatları qarşısında öhdəlikləri 3,9% azalaraq 2 721,4 milyon manat, qurumun balans kapitalı isə 42,2% azalaraq 2 576,4 milyon manat olub.

Report