Bakıdan Dehliyə birbaşa aviareysin açılması tarixi əhəmiyyətli hadisədir. Çünki bütün iqtisadi əlaqələr, işgüzar insanların səfərləri, turistlərin bir ölkədən digərinə getməsi və ümumilikdə mədəni münasibətlər məhz birbaşa aviareyslərdən asılıdr.

Bu sözləri  Azərbaycanın Hindistandakı səfiri Əşrəf Şıxəliyev deyib.

"Düşünürəm ki, yaxın gələcəkdə Azərbaycanla Hindistan arasında insanların səfərləri əhəmiyyətli dərəcədə artacaq. Ölkəmizə çoxsaylı Hindistan nümayəndə heyəti və işgüzar adamlar gəlir, birbaşa aviareys sayəsində isə bu rəqəm qat-qat çoxalacaq. Güman edirəm ki, bunun nəticəsində Hindistanın biznes şirkətləri Azərbaycana böyük məbləğdə investisiya yatıracaqlar. Bir il öncəki rəqəmlərə nəzər salanda görərik ki, ölkəmizdə elədə çox Hindistan şirkəti fəaliyyət göstərmirdi. Lakin hazırda Azərbaycanda 230-dək hind şirkəti çalışır. Birbaşa aviareysin açılması sayəsində bu rəqəm artacaq", - deyə səfir qeyd edib.

O, Hindistanın turizm və kino şirkətlərinin Azərbaycana çox böyük maraq göstərdiyini bildirib: "Hind kinematoqrafçıları demək olar ki, Azərbaycanda hər ay bir film çəkirlər. Bu yaxınlarda Bollivudun ən məşhur 10 rejissor və prodüseri ölkəmizə səfər etməklə yeni çəkiliş məkanı kimi Azərbaycanı kəşf edib və çox bəyəniblər. Hindistan toyları da Azərbaycanda keçirilir və buna böyük maraq var. Birbaşa aviareysin açılması bütün bunların həyata keçirilməsində olduqca vacib vasitədir".

"Hindistan kimi nəhəng ölkədə bir neçə iqtisadi mərkəz var. Mumbay kimi 20 milyon əhalisi olan şəhərdən çoxsaylı insanlar Bakıya səfər etmək, ola bilsin ki Azərbaycan paytaxtından da Avropa ölkələrinə getmək marağındadırlar. Buna görə də, Hindistan və Azərbaycanın böyük şəhərləri arasında birbaşa aviareyslərin açılması həm ölkəmizə gələn turistlərin sayının artmasına xidmət edəcək, həm də Azərbaycanı Avropaya gedən hind turistlərə əlverişli tranzit ölkə kimi təqdim etməyə imkan verəcək. Bunun sayəsində ölkəmizin büdcəsinə əlavə gəlir daxil olacaq", - deyə səfir vurğulayıb.

Qeyd edək ki, “Azərbaycan Hava Yolları” Qapalı Səhmdar Cəmiyyəti (AZAL) iyunun 25-dən Bakıdan Hindistanın ən böyük şəhərlərindən biri - Dehliyə müntəzəm və çarter reysləri həyata keçirməyə başlayıb. AZAL-ın reysləri həftədə 2 dəfə - çərşənbə axşamı və cümə günləri həyata keçirilir.

PULSUZ SEMİNARA QATIL, QAZANMAĞI ÖYRƏN!

© Azərtac