2019-cu il martın 1-i vəziyyətinə Azərbaycanda iqtisadi fəal əhalinin sayı 5 milyon 130 min nəfər olmuş, onlardan 4 milyon 876 min nəfərini məşğul əhali təşkil etmişdir.

“Marja” xəbər verir ki, bu, Dövlət Statistika Komitəsinin aylıq hesabatında bildirilir.

Diqqəti cəlb edən muzdla işləyənlərin sayının məşğul əhalinin sayından 3 dəfə az olmasıdır. Bu fakt, ölkədə əmək müqaviləsiz işçilərin sayının yüksək olduğuna işarədir. 

Cari il fevralın 1-i vəziyyətinə muzdla işləyənlərin sayı 1 milyon 523,8 min nəfər, o cümlədən iqtisadiyyatın dövlət sektorunda 862,8 min nəfər, qeyri-dövlət sektorunda isə 661 min nəfər təşkil etmişdir. İqtisadiyyatın neft sektorunda 34,3 min nəfər, qeyri-neft sektorunda isə 1 milyon 489,5 min nəfər çalışmışdır.

Rəsmi statistikaya görə, ölkədəki 4 milyon 876 min məşğul əhalinin 1 milyon 523,8 min nəfəri əmək müqaviləsi ilə (muzdla), 3 milyon 352,2 min nəfəri isə müstəqil işləyir.

2019-cu il mart ayının 1-i vəziyyətinə məşğulluq xidməti orqanlarında qeydiyyata alınmış işsiz şəxslərin sayı 24,7 min nəfər olmuş, onların 36,2 faizini qadınlar təşkil etmişdir. İşsizlikdən sığorta ödənişinin orta məbləği 219,2 manat olmuşdur.

Rəsmi statistikaya görə, ölkədə işsizlərin sayı 254 min nəfərdir (İqtisadi fəal əhali çıxılsın məşğul əhali).

İqtisadi fəal əhali (işçi qüvvəsi) - bütün işləyənlərin (məşğul) və işsizlərin məcmusudur. İqtisadi fəal əhali məşğulluq növlərinə görə aşağıdakı kimidir: iqtisadiyyatda məşğul olanlar, din xadimləri, hərbi qulluqçular, işsizlər. Həm muzdla (işin daimi, müvəqqəti, mövsümi, təsadüfi və ya birdəfəlik olub-olmamasından asılı olmayaraq), həm də müstəqil iqtisadi əmək fəaliyyəti ilə məşğul olanlar bura aid edilirlər. Belə olan tərzdə, dövlət müəssisə və təşkilatlarında, xüsusi və qarışıq mülkiyyətdə olan müəssisələrdə, kəndli təsərrüfatlarında işləyənlər, habelə fərdi əmək fəaliyyəti ilə məşğul olanlar, öz şəxsi təsərrüfatlarında çalışanlar və ayrı-ayrı şəxslərə xidmət edənlər məşğulların sayında nəzərə alınır.

TƏK ŞƏXSİYYƏT VƏSİQƏSİLƏ 15 DƏQİQƏYƏ KREDİT!

Muzdla işləyənlər (muzdlu işçilər) - müxtəlif mülkiyyət formalı müəssisənin, idarənin, təşkilatın rəhbəri ilə və ya ayrı-ayrı şəxslərlə əmək şəraiti və əmək ödənişi haqqında daimi, müvəqqəti və ya mövsümi əmək müqaviləsi (kontrakt, saziş) bağlamış bütün işçilərdir.