Dünyanın ən varlı adamı Jeff Bezos tərəfindən qurulan və idarə olunan "Amazon"un, keçən il 11 milyard mənfəət əldə etməsinə baxmayaraq mənfəət vergisi ödəmədiyi ortaya çıxıb.

"Marja" xəbər verir ki, Amerikan Vergiqoyma və İqtisadi Siyasəti İnstitutu (ITEP) tərəfindən açıqlanan hesabata görə, dünyanın ən böyük elektron ticarət şirkəti "Amazon", iki il ardıcıl federal gəlir (mənfəət) vergisini ödəməyib.

Donald Trampın istehsal və məşğulluğu xarici ölkələrdən ABŞ-a transfer etmək üçün imzaladığı Vergi Güzəştləri və Məşğulluq (TCJA) qanununa görə, 35% olan vergi nisbəti 21%-ə endirilərək şirkətlərə ciddi bir vergi endirimi təmin edilmişdir.

Son rübdə 72.4 milyard dollar gəlir əldə edən və 2018-ci ildə 11.2 milyard dollar mənfəət açıqlayan "Amazon"  21% nisbətində vergini ödəməməyi bacararaq sıfır mənfəət vergisilə ili bağlayıb.

Yaxşı bu necə ola bilər?

"Yahoo"nun xəbərinə görə, Federal Vergi İdarəsinin (ITEP) direktoru Steve Wamhoff, "Tam olaraq nə etdiklərini bilmək çətindir. Rəsmi sənədlərdə vergi strategiyalarını açıqlamırlar. Vergi endirimləri qeyri-müəyyəndir. Bu səbəbdən şirkətin nədən faydalandığı naməlumdur" ifadələrini istifadə edib.

"Amazon", 2017-ci ildə açıqladığı 5.6 milyard dollarlıq mənfəətdən də heç vergi ödəməmişdi. Mütəxəssislər bu vəziyyətin yeni qanundakı boşluqlardan qaynaqlana biləcəyini qeyd edirlər.

"Amazon" verdiyi açıqlamada, həm ABŞ, həm də fəaliyyət göstərdiyi digər ölkələrdə ödənməsi lazım olan hər cür verginin ödəndiyini qeyd edib.

ABŞ Prezidenti Donald Tramp isə ötən aylarda "Amazon" və qurucusu, dünyanın ən varlı adamı Cef Bezosu az vergi ödədiyinə görə sərt bir şəkildə tənqid etmişdi. Tramp, yeni vergi qanununda bütün xüsusi təşviqlərin ləğv ediləcəyini və boşluqların aradan qaldırılacağını açıqlamışdı. 

Mütəxəssislər yalnız "Amazon"un deyil, "Netflix"in də federal vergini ödəmədiyini, nümunələrin artırıla biləcəyini qeyd edirlər. 

22 trilyon dollar dövlət borcu ilə rekord qıran ABŞ-ın, vergi gəlirlərindəki azalma səbəbilə büdcə kəsirin artdığına da diqqət çəkilir.