“Bank Respublika” ASC 2018-ci ilin 9 ayını 1 milyon 213 min manat xalis mənfəət ilə başa vurub. Halbuki Bank, ötən ilin eyni dövrünü 1 milyon 619 min manat zərər ilə bağlamışdı.

GƏLİRLƏRİ ARTIB

“Marja” Bankın maliyyə hesabatlarına istinadən xəbər verir ki, cari ilin yanvar-sentyabr dövründə “Bank Respublika”nın cəmi gəlirləri 47 milyon 745 min manat (29 milyon 182 min manatı faiz, 18 milyon 563 min manatı qeyri-faiz gəlirləri), cəmi xərcləri isə 41 milyon 526 min manat (12 milyon 643 min manatı faiz, 28 milyon 883 min manatı qeyri-faiz xərcləri) təşkil edib. Xərclər gəlirlərdən çıxıldıqda Bankın 6  milyon 218 min manat əməliyyat mənfəəti qalıb. Əməliyyat mənfəətinin 5  milyon 5 min manatı aktivlər üzrə mümkün zərərlərin ödənilməsi üçün xüsusi ehtiyatın yaradılmasına yönəldilib. Nəticədə Bank 9 ayı 1 milyon 213 min manat mənfəətlə bağlayıb.

Müqayisə üçün qeyd edək ki, 2017-ci ilin 9 ayı ərzində “Bank Respublika”nın cəmi gəlirləri 45 milyon 471 min manat (23 milyon 92 min manatı faiz gəlirləri, 22 milyon 379 min manatı qeyri-faiz gəlirləri), cəmi xərcləri 40 milyon 904 min manat (17 milyon 714 min manatı faiz xərcləri, 23 milyon 190 min manatı qeyri-faiz xərcləri) təşkil etmiş, Bank həmin dövrü 4 milyon 567 min manat əməliyyat mənfəəti ilə başa vurmuş,  ehtiyatlara 6 milyon 186 min manat ayırmışdı.

 “Bank Respublika”nın cəmi gəlirləri cari ilin 9 ayında ötən ilin 9 ayı ilə müqayisədə 5% və ya 2 milyon 274 min manat, cəmi xərcləri isə 1,5% və ya 622 min manat artıb. Bankın faiz gəlirləri 26,4% artıb, qeyri-faiz gəlirləri 17% azalıb. Eyni zamanda, Bankın faiz xərcləri 28,6% azalıb, qeyri-faiz xərcləri 24,5% artıb.

Müqayisə olunan dövrdə “Bank Respublika”nın  əməliyyat mənfəəti 36% artıb, ehtiyatlara ayırma isə 19% azalıb.  Əməliyyat mənfəəti ehtiyatlara ayırmanı üstələdiyindən Bank mənfəətə çıxıb.

AKTİVLƏRİ 1 MİLYARD MANATA YAXINDIR

30 Sentyabr 2018-ci il tarixində “Bank Respublika”nın cəmi aktivləri 976 milyon 15 min manat təşkil edib. Bu, ötən ilin sonu ilə müqayisədə 39% çoxdur. Aktivlərin 31%-ni və ya 299 milyon 542 min manatını müştərilərə verilmiş kreditlər, 52%-ni və ya 510 milyon 743 min manatını müxbir hesablar təşkil edib. Aktivlərin artmasının səbəbi müxbir hesabların 69%, kredit portfelinin 30,4% artmasıdır.

31 Dekabr 2017-ci il tarixində“Bank Respublika”nın cəmi aktivləri 702 milyon 114 min manat, o cümlədən müştərilərə verilmiş kreditlər 214 milyon 908 min manat, müxbir hesablar 302 milyon 309 min manat təşkil etmişdi.

DEPOZİTLƏRDƏ BÖYÜK ARTIM

Diqqəti cəlb edən “Bank Respublika”nın depozit portfelinin (hüquqi və fiziki şəxslərin şəxslərin depozitləri) 51% artaraq 471 milyon 802 min manatdan 712 milyon 627 min manata yüksəlməsidir.

30 Sentyabr 2018-ci il tarixində “Bank Respublika” 55 milyon 313 min manat cəmi balans kapitalına, 50 milyon 542 min manat məcmu kapitala malik olub.