Əhalinin və biznesin borc yükünün azaldılması üçün araşdırmalar aparılır.

“Bütövlükdə bank sektorunun sağlamlaşdırılması, onun maliyyə vasitəçiliyi funksiyasının təmin edilməsi, o cümədən də əhalinin və biznesin maliyyə vəziyyətinin sağlamlaşdırılması istiqamətində araşdırmalar həyata keçirilir”.

“Marja”nın məlumatına görə, bunu Aprelin 9-da keçirilmiş mətbuat konfransında Mərkəzi Bankın sədri Elman Rüstəmov bildirib.

Elman Rüstəmov qeyd edib ki, o cümlədən, devalvasiyalardan sonra artmış problemli kreditlər probleminin həll edilməsi istiqamətində araşdırmalar aparılır:

“Bu araşdırmalar tam yekunlaşandan sonra hökumət və Mərkəzi Bank müəyyən qərarlar qəbul edə bilər. Biz hələlik araşdırma mərhələsindəyik”.

Qeyd edək ki, banklarda ödəmə vaxtı keçmiş kreditlərin məbləği 1,7 milyard manatı keçib. Bu bankların müştərilərə verdikləri cəmi kreditlərin 15%-nə yaxındır.

“Marja”nın bank dairələrindən də əldə etdiyi məlumata görə, Maliyyə Bazarlarına Nəzarət Palatası devalvasiyalardan sonra yaranmış problemli kreditlərin azaldılması istiqamətində müxtəlif təkliflər hazırlayıb. Mənbənin sözlərinə görə, xeyli müddətdir təkliflər müzakirə olunur və bu çərçivədə bankların da fikirləri öyrənilir.

Qeyd edək ki, bu günə qədər iqtisadçı ekspertlər tərəfindən mətbuatda müxtəlif  təkliflər irəli sürülüb. 

Təkliflərdən biri devalvasiya nəticəsində artmış borcun dövlət, vətəndaş və bank arasında bölüşdürülərək qaytarılmasıdır. Qısası bu təklif qəbul olunarsa, borcun bir hissəsi dövlət tərəfindən, bir hissəsi borcalan tərəfindən ödəniləcək, digər bir hissəsi isə bank tərəfindən güzəşt ediləcəkdir.

Digər bir təklifə görə, xarici valyutada olan kreditin aşağı məzənnə ilə ödənilməsi imkanının yaradılmasıdır. 

Həmçinin, təkliflər çərçivəsində borcunu qaytaracaq şəxslərin adlarının kredit reystrinin “qara siyahsında” nəzərə alınması da müzakirə predmetidir.

Qeyd edək ki, əhalinin dollarla götürdüyü kreditlərini ödəməməsinin başlıca səbəbi aidiyyatı qurumların güzəştlə bağlı hər hansısa bir addım atacağına ümid edilməsidir.