2026-cı ilin yanvar-oktyabr aylarında dövlət büdcəsinin icrasında müsbət dinamika müşahidə olunub.

Maliyyə Nazirliyinin yaydığı məlumata görə, bu dövrdə xəzinə əməliyyatlarına dair müraciətlərin qanunvericiliyin tələblərinə uyğun, sürətli və xətasız icrası təmin edilib, xəzinədarlıq orqanları tərəfindən 1 milyon 110 mindən çox ödəniş tapşırığı vaxtında və tam şəkildə icra edilib.

Cari ilin yanvar-oktyabr ayları ərzində dövlət büdcəsinin gəlirləri 33 milyard 569 milyon 600 min manat təşkil edib ki, bu da proqnozu 1 milyard 163 milyon 500 min manat və ya 3.6 faiz üstələyib.

Dövlət büdcəsinin gəlirlərində İqtisadiyyat Nazirliyi yanında Dövlət Vergi Xidmətinin xətti ilə daxilolmalar 16 milyard 65 milyon 200 min manat təşkil edərək proqnozdan 1 milyard 274 milyon 100 min manat və ya 8.6 faiz, İqtisadiyyat Nazirliyi yanında Əmlak Məsələləri Dövlət Xidməti üzrə daxilolmalar 47 milyon 700 min manat təşkil edərək proqnozdan 11 milyon 800 min manat və ya 33 faiz, sair daxilolmalar 540 milyon manat təşkil edərək proqnozdan 106 milyon 800 min manat və ya 24.6 faiz, Dövlət Gömrük Komitəsi üzrə daxilolmalar 5 milyard 613 milyon 500 min manat təşkil edərək proqnozdan 1 milyon 500 min manat və ya 0.03 faiz çox, Dövlət Neft Fondundan transfert isə 10 milyard 697 milyon manat təşkil edərək proqnoza qarşı 100 faiz icra edilib.

Hər gün yeni vakansiyalar - AzVak.az-da

Eyni zamanda, dövlət büdcəsindən maliyyələşən təşkilatların ödənişli xidmətlərindən daxilolmalar 606 milyon 100 min manat təşkil edərək proqnoza qarşı 72.4 faiz icra olunub.

Yanvar-oktyabr ayları ərzində dövlət büdcəsinin xərcləri 28 milyard 761 milyon 400 min manat məbləğində icra edilib ki, bu da ötən ilin müvafiq dövrü ilə müqayisədə 1 milyard 40 milyon 800 min manat və ya 3.8 faiz çoxdur. 

Yanvar-oktyabr ayları ərzində dövlət büdcəsinin icrası nəticəsində 4 milyard 808,2 milyon manat profisit (büdcə artıqlığı) yaranıb.

2026-cı ilin yanvar-oktyabr ayları ərzində icmal büdcənin gəlirləri 41 milyard 952 milyon manat, xərcləri isə 34 milyard 82 milyon 400 min manat məbləğində icra edilib.