Türkiyədə pendir istehsalı, etiketlənməsi, saxlanılması və satışına dair yeni qaydalar qüvvəyə minib. Dəyişikliklərə əsasən, bəzi pendir növlərinin adlandırılmasına məhdudiyyətlər qoyulub, əridilmiş pendirlərin açıq şəkildə satışı qadağan edilib, məhsulların tərkibinə və duz miqdarına dair yeni standartlar müəyyənləşdirilib.

Marja.az xəbər verir ki, Türkiyənin Kənd Təsərrüfatı və Meşə Təsərrüfatı Nazirliyi tərəfindən hazırlanan yeni “Türkiyə Qida Kodeksi – Pendir haqqında Təlimat” noyabrın 10-da ölkənin Rəsmi Qəzetində dərc olunaraq qüvvəyə minib.

Yeni sənədlə 2015-ci ildən qüvvədə olan əvvəlki qaydalar ləğv edilib.

Dəyişikliklərin əsas məqsədi istehlakçıların məhsullar haqqında düzgün məlumatlandırılması, ənənəvi pendir növlərinin qorunması, istehsalda keyfiyyət standartlarının gücləndirilməsi və bazarda şəffaflığın artırılmasıdır.

Pendirlərin adlandırılmasına yeni qadağalar

Yeni qaydalara əsasən, əridilmiş pendirlərin Türkiyədə ənənəvi olaraq istehsal edilən pendir növlərini xatırladan adlarla bazara çıxarılmasına icazə verilməyəcək. Belə məhsullar “kaşar”, “tulum”, “çeçil”, “dil” və “örgü” kimi ənənəvi pendir növləri ilə qarışdırılacaq şəkildə adlandırıla və reklam edilə bilməz.

Eyni zamanda, pendirlərin etiketlərində “kənd pendiri”, “ənənəvi pendir”, “təbii pendir” və “ferma pendiri” kimi ifadələrin istifadəsi qadağan olunur. Bu məhdudiyyətlərlə istehlakçıların məhsulun həqiqi növü və tərkibi barədə yanlış təsəvvürə düşməsinin qarşısının alınması hədəflənir.

Etiketlərdə “əridilmiş pendir” ifadəsi məcburi olacaq

“Tost pendiri” və “səhər yeməyi pendiri” kimi təqdim edilən məhsullarla bağlı da yeni tələblər müəyyənləşdirilib. Əridilmiş pendir kateqoriyasına daxil olan məhsulların qablaşdırmasında onların əsl növünü göstərən “əridilmiş pendir” ifadəsinin aydın şəkildə qeyd edilməsi tələb olunacaq. Bu ifadənin etiketdə ən azı 3 millimetr ölçüdə göstərilməsi nəzərdə tutulur.

Hər gün yeni vakansiyalar - AzVak.az-da

Bundan əlavə, məhsulların yağlılıq dərəcəsi və yetişdirilmə vəziyyəti etiketdə məhsulun adı ilə birlikdə göstərilməlidir. Yetişdirilmiş pendirlərin üzərində istehsal tarixi gün, ay və il formatında qeyd ediləcək. Həmçinin məhsulun nə qədər müddətdə yetişdirildiyi barədə məlumatın verilməsi məcburi olacaq.

Əridilmiş pendirlərin açıq satışı qadağan edildi

Yeni qaydalarla əridilmiş pendirlərin qablaşdırılmadan, açıq şəkildə satışa çıxarılmasına son qoyulub. Bu məhsullar istehlakçılara qablaşdırılmış və etiketlənmiş formada təqdim edilməlidir.

Həmçinin pendir istehsalının aralıq məhsulu olan pendir laxtasının birbaşa istehlakçılara satışı qadağan edilir. Dəyişikliklər məhsulların mənşəyinin, istehsalçısının və tərkibinin daha asan izlənilməsini təmin etməyə yönəlib.

Pendirlərə əlavə edilən qatqıların miqdarı məhdudlaşdırıldı

Yeni qaydalara əsasən, ədviyyat və digər dadlandırıcı əlavələrdən istifadə edilən pendirlərdə bu maddələrin ümumi miqdarı məhsulun 6 faizindən çox ola bilməz.

Dadlandırıcı əlavələrdən istifadə edilən təzə pendirlərdə isə maksimum hədd 15 faiz müəyyənləşdirilib. Fındıq və fıstıq pastası, günəbaxan tumu və qarğıdalı kimi bəzi məhsulların dadlandırıcı əlavə kimi istifadəsinə məhdudiyyətlər qoyulub. Şəkər əlavə edilən təzə pendirlərin etiketində əlavə şəkərin miqdarının göstərilməsi də tələb olunacaq. Bu tədbirlər pendirin əsas tərkibinin və xarakterik xüsusiyyətlərinin qorunmasına xidmət edir.

Bitki yağlarının istifadəsinə nəzarət gücləndirilir

Yeni qaydalara əsasən, pendir istehsalında süd zülalından başqa zülallardan, soya məhsullarından, jelatindən, nişasta və nişasta əsaslı məhsullardan, həmçinin süd yağından başqa heyvan və bitki yağlarından istifadə qadağan edilir.

İstisna olaraq, dadlandırıcı əlavələrdən istifadə edilən təzə pendirlərin istehsalında texnoloji cəhətdən zəruri miqdarda nişastadan stabilizator kimi istifadə oluna bilər.

Bundan başqa, məhsulların tərkibində bitki mənşəli yağların aşkarlanmasını asanlaşdırmaq üçün beta-sitosterol göstəricisinə dair yeni meyarlar tətbiq ediləcək.

Bu mexanizm pendirlərin tərkibinə qanunvericiliyə zidd maddələrin əlavə edilməsinin müəyyənləşdirilməsinə imkan yaradacaq.

Ağ pendir və kaşar pendiri üçün duz normaları dəyişdirilib

Yeni sənəddə Türkiyənin ənənəvi pendir növlərinin xüsusiyyətlərinin qorunması məqsədilə duz miqdarına dair normalar yenilənib. Yetişdirilmiş ağ pendirdə quru maddə üzrə icazə verilən maksimum duz miqdarı 7,5 faizə, yetişdirilmiş kaşar pendirində isə 5 faizə müəyyən edilib. Bu dəyişikliklərlə ənənəvi istehsal üsulları ilə hazırlanan pendirlərin xarakterik dadının və keyfiyyətinin qorunması nəzərdə tutulur.

Çiy süddən hazırlanan pendirlər ən azı 4 ay yetişdirilməlidir

Yeni qaydalara əsasən, çiy süddən və ya termizasiya prosesindən keçirilmiş süddən istehsal edilən, pendir laxtası qaynar suda emal olunmayan pendirlər ən azı 4 ay yetişdirilmədən satışa çıxarıla bilməz.

Yetişdirilmədən satışa təqdim edilən pendirlərin istehsalında isə süd ən azı pasterizasiya standartlarına uyğun istilik emalından keçirilməlidir.

Çiy süddən hazırlanan müəyyən pendir növlərinin etiketində ən azı 3 millimetr ölçüdə “çiy süddən istehsal edilmişdir” ifadəsinin göstərilməsi də məcburi olacaq.

Bundan başqa, ən azı 120 gün yetişdirilən kaşar pendirlərində “köhnə” mənasını verən “eski” ifadəsindən istifadəyə icazə veriləcək.

Pendir istehsalçılarına 30 aprel 2027-ci ilədək vaxt verilib

Yeni qaydalarla pendirlərin saxlanılması, daşınması və satışa təqdim edilməsi zamanı temperaturun 10 dərəcədən aşağı olması tələb edilir. Mövcud qida müəssisələrinə yeni standartlara uyğunlaşmaq üçün 30 aprel 2027-ci ilədək keçid müddəti verilib. Bu tarixdən əvvəl bazara çıxarılan məhsullar yararlılıq müddəti başa çatanadək satışda qala biləcək.

Lakin yeni tələblərə cavab verməyən dilimlənə bilən əridilmiş pendirlərin 30 aprel 2027-ci ildən sonra bazarda saxlanılmasına icazə verilməyəcək.

Yeni qaydaların Türkiyənin pendir istehsalı sektorunda məhsul tərkibinə nəzarəti gücləndirəcəyi, istehlakçıların məlumatlandırılmasını yaxşılaşdıracağı və bazarda vahid keyfiyyət standartlarının tətbiqini genişləndirəcəyi gözlənilir.

Hər gün yeni vakansiyalar - AzVak.az-da