Azərbaycan Mərkəzi Bankı növbəti qərarlarında uçot faiz dərəcəsini azaltmayacaq.

Bu barədə Niderlandın ən böyük maliyyə qrupu olan “ING Group”dan bildirilib.

Hesabatda qeyd olunub ki, mövcud inflyasiya riskləri fonunda Azərbaycan Mərkəzi Bankının (AMB) uçot dərəcəsini azaltması üçün əlavə imkan yoxdur. Qeyd olunub ki, qlobal və daxili inflyasiya təzyiqləri, xüsusilə ərzaq qiymətləri və tarif artımları monetar yumşalma üçün əsas məhdudlaşdırıcı amillərdir.

ING-in analitikləri vurğulayıb ki, 2025-ci ildən etibarən inflyasiya 5–6% intervalında qalır və 2026-cı ilin əvvəlində daxili kommunal tarif dəyişiklikləri səbəbindən yenidən artım müşahidə olunub. Eyni zamanda, Azərbaycanın idxalının əhəmiyyətli hissəsinin Yaxın Şərqdəki geosiyasi gərginlikdən təsirlənən regionlardan formalaşması inflyasiya üzrə yuxarı riskləri artırır.

Hesabatda bildirilib ki, monetar siyasətin daha da yumşaldılması yalnız inflyasiyanın gözlənilməz şəkildə aşağı düşməsi halında mümkün ola bilər. Lakin hazırkı şəraitdə belə bir ssenari əsas gözlənti kimi qiymətləndirilmir.

Qeyd edək ki, AMB uçot faiz dərəcəsi ilə bağlı növbəti qərarını sabah, yəni aprelin 2-də açıqlayacaq. Bundan əvvəl, AMB fevral ayının 4-də faiz dəhlizinin bütün parametrlərini 0.25 faiz bəndi azaldıb. Uçot dərəcəsi 6.5%, faiz dəhlizinin aşağı həddi 5.5%, faiz dəhlizinin yuxarı həddi isə 7.5% səviyyəsinə endirilib.

XXX

"ING Group" idxal inflyasiyasının Azərbaycana təsirini açıqlayıb

Qlobal ərzaq qiymətlərində 10% artım Azərbaycanda inflyasiyanı təxminən 1.5 faiz bəndi yüksəldə bilər.

Bu barədə Niderlandın ən böyük maliyyə qrupu olan “ING Group”dan bildirilib.

Qeyd olunub ki, ölkənin idxalının təxminən 46%-i inkişaf etmiş bazarlardan və Yaxın Şərq gərginliyindən təsirlənən regionlardan formalaşır ki, bu da iqtisadiyyatı idxal inflyasiyasına qarşı həssas edir.

ING analitikləri vurğulayıb ki, inflyasiya riskləri yüksək olaraq qalır və qiymət artımına həm xarici, həm də daxili amillər təsir göstərir. Xüsusilə, qlobal ərzaq bazarındakı bahalaşma və daxili kommunal tarif artımları inflyasiya təzyiqlərini gücləndirən əsas faktorlar kimi qiymətləndirilir.

Qeyd edilib ki, 2024-cü ildə aşağı inflyasiya dövründən sonra qiymət artımı 2025-ci ildən etibarən 5–6% intervalına yüksəlib və bu səviyyədə qalır. 2026-cı ilin əvvəlində isə daxili tarif dəyişiklikləri fonunda inflyasiya daha da sürətlənib.

Bu şəraitdə, ING monetar siyasətin daha da yumşaldılması üçün əlavə imkan görmür. Bankın fikrincə, inflyasiya üzrə yuxarı risklərin davam etməsi faiz dərəcələrinin endirilməsi imkanlarını məhdudlaşdırır.

Hesabatda həmçinin qeyd olunub ki, idxalın strukturunda Yaxın Şərqdəki geosiyasi gərginlikdən təsirlənən regionların payının yüksək olması Azərbaycanın qiymət sabitliyi üçün əsas risk faktorlarından biri olaraq qalır.

İş elanları AzVak.az-da

© APA