Uçuş coğrafiyasının genişləndirilməsi və görülən digər işlər "Azərbaycan Hava Yolları" QSC-nin (AZAL) maliyyə göstəricilərinə müsbət göstərib. AZAL 2024-cü ili 216 milyon 666 min manat xalis mənfəət ilə başa vurub. Halbuki, Şirkət 2023-cü ili 116 milyon 598 min manat xalis mənfəət ilə bağlamışdı. Beləliklə, AZAL-ın xalis mənfəəti 2024-cü ildə 2023-cü illə müqayisədə 100 milyon 68 min manat və ya 85,8% artıb. Əməliyyat icarəsi üzrə gəlirlərin, sair gəlirlərin, maliyyə gəlirlərinin (faiz gəlirlərinin) artması və maliyyə xərclərinin kəskin azalması hesabına dövlət şirkətinin xalis mənfəətində artım baş verib.

Marja.az xəbər verir ki, AZAL-ın daşımalar və digər xidmətlər üzrə gəlirləri 2023-cü ildə 1 milyard 467 milyon 143 min manat ikən, 2024-cü ildə 1 milyard 954 milyon 533 min manat təşkil edib (487 min 390 manat manat və ya 33,2% artıb).

2024-cü ildə həmçinin AZAL əməliyyat icarəsi üzrə 17 milyon 860 min manat, maliyyə gəlirləri üzrə 9 milyon 515 min manat, sair gəlirlər üzrə 24 milyon 240 min manat gəlir əldə edib, dövlətdən 22 milyon 400 min manat subsidiya alıb. 

AZAL-ın əməliyyat xərcləri 2023-cü ildə 1 milyard 187 milyon 312 min manat ikən, 2024-cü ildə 1 milyard 689 milyon 800 min manata yüksəlib (502 milyon 488 min manat və ya 42,3% artıb). Başqa sözlə, əməliyyat xərclərindəki artım, daşımalar və digər xidmətlər üzrə gəlirlərdəki artımı üstələyib.

2024-cü ildə AZAL-ın cəmi gəlirləri 2 milyard 28 milyon 548 min manat (2023-cü ildə 1 milyard 505 milyon 61 min), cəmi xərcləri 1 milyard 811 milyon 882 min manat (2023-cü ildə 1 milyard 388 milyon 463 min manat), cəmi gəlirlər cəmi xərcləri üstələdiyi üçün xalis mənfəəti 216 milyon 666 min manat təşkil edib. 

Hər gün yeni vakansiyalar - AzVak.az-da

Şirkət dövlət konserni kimi 17 avqust 1992-ci ildə təsis edilmişdir və Azərbaycan Respublikasında dövlət qeydiyyatına alınmışdır. 2008-ci ilin aprel ayında Azərbaycan Respublikası Prezidentinin sərəncamı əsasında Şirkət Qapalı Səhmdar Cəmiyyəti kimi yenidən təşkil edilmişdir. Şirkət Azərbaycan Respublikasının Milli aviadaşıyıcısı kimi müəyyən edilmişdir. 31 dekabr 2024 və 2023-cü il tarixlərinə Şirkətin yeganə mülkiyyətçisi Azərbaycan dövlətidir. 2021-ci ilin fevral ayında Şirkətin idarəetməsi Azərbaycan Respublikası Prezidentinin Sərəncamına əsasən Maliyyə Nazirliyindən tamamilə dövlət mülkiyyətində olan Azərbaycan İnvestisiya Holdinqinin idarəetməsinə verilmişdir. 2024-cü ilin noyabr ayında Şirkətin idarəetməsi Azərbaycan Respublikası Prezidentinin Sərəncamına əsasən Azərbaycan Investisiya Holdinqindən (AİH) tamamilə dövlət mülkiyyətində olan Azərbaycan Nəqliyyat və Kommunikasiya Holdinqinə (AZCON) ötürülmüşdür.