15 noyabr tarixində “Gülüstan” Sarayında keçirilən Təchizat Zənciri Liderləri Zirvəsinin sponsorlarından biri "Karabakh Group" şirkəti olub.

Şirkət tədbirdə xüsusi stendlə iştirak edərək Qarabağda və bir çox regionda icra etdiyi tikinti və infrastruktur layihələri, eləcə də müasir idarəetmə və satınalma yanaşmaları barədə iştirakçılara məlumat təqdim edib.

Tədbir çərçivəsində təşkil olunan panel müzakirələrində şirkətin Maliyyə və Kommersiya direktoru Aqil Talıbov spiker qismində çıxış edib. O, tikinti sektorunda sənədləşmə və aktlaşdırma mədəniyyətinin əhəmiyyətindən bəhs edərək vurğulayıb ki, layihələrin dayanıqlığı yalnız texniki icra ilə deyil, həm də sağlam sənədləşmə sistemi ilə təmin olunur.

Aqil bəy bildirib ki, zəif sənədləşmə və gecikmələr büdcə itkilərinə, satınalma proseslərində qeyri-müəyyənliyə səbəb olur. Onun sözlərinə görə, sənədləşmə mühəndisliyinin ayrıca peşə sahəsi kimi inkişaf etdirilməsi və rəqəmsal sistemlərin tətbiqi tikinti sənayesinin keyfiyyət və şəffaflıq standartlarını yüksəldə bilər.

Maliyyə direktoru həmçinin qeyd edib ki, satınalmada yalnız ən aşağı qiymət prinsipi deyil, “ən ağıllı təklif” yanaşması prioritet olmalıdır. O, sadələşdirilmiş prosedurların və çevik ödəniş mexanizmlərinin KOB-ların tikinti və təchizat proseslərinə daha aktiv qoşulmasına imkan yaratdığını vurğulayıb. KOB-ların aktiv iştirakı həm bazarda sağlam rəqabəti formalaşdırır, həm də yerli istehsalın və xidmətlərin keyfiyyətini yüksəldir.

"Karabakh Group" tədbirdə həm sponsor, həm də spiker qismində iştirak edərək sektorun inkişafı, sənədləşmə mədəniyyəti və satınalma standartları ilə bağlı önəmli mesajlar verib.

Qeyd edək ki, "Karabakh Group" - Qarabağ regionunda və ölkənin müxtəlif ərazilərində genişmiqyaslı tikinti, infrastruktur layihələri həyata keçirən və layihələrin idarə olunması üzrə peşəkar həllər təqdim edən yerli şirkətdir. Şirkət müasir idarəetmə yanaşmaları, təhlükəsizlik standartları, rəqəmsal proseslər və dayanıqlı tikinti təcrübəsinə əsaslanaraq fəaliyyət göstərir. Karabakh Group həm dövlət, həm də özəl sektor üçün iri həcmli layihələrin icrasında etibarlı tərəfdaş kimi tanınır.