Qolf villaları və rezidensiya kompleksini idarə edən “Xəyal Adası” MMC (Dreamland) 2024-cü ili 1 milyon 291 min manat zərər ilə başa vurub. Şirkət 2023-cü ili 6 milyon 562 min manat zərər ilə bağlamışdı. Göründüyü kimi, ötən il zərər 5,1 dəfə azalsa da, hələ də “Xəyal Adası” şirkəti mənfəətin xəyalını qurur.

Marja.az xəbər verir ki, 2023-cü ili 4 milyon 519 min manat xalis zərər ilə bağlamış Şirkət, 2024-cü ili 647 min manat xalis mənfəət ilə yekunlaşdırsa da, yenidənqiymətləndirmə zərəri xalis mənfəəti tamamilə silib.

“Xəyal Adası” şirkətinin əsas əməliyyat gəliri 2023-cü ildə 36 milyon 491 min manat ikən, 2024-cü ildə 68 milyon 270 min manata yüksəlib (31 milyon 779 min manat və ya 87% artıb).

Ötən il “Xəyal Adası” MMC-də işlərin maya dəyəri, ümumi, administrativ və amortizasiya xərcləri artdığından, gəlirlərdəki artımın böyük hissəsi silinib. 

31 dekabr 2024-cü il tarixində “Xəyal Adası” MMC 326 milyon 867 min manat cəmi aktivlərə malik olub. Şirkət 2023-cü ilin sonunda 317 milyon 886 min manat cəmi aktivlərə malik idi. 

Ötən ilin sonunda Şirkətin 10 milyon manata yaxın yığılmış zərəri olub.

Qeyd edək ki “Xəyal Adası” MMC 31 iyul 2006-cı ildə dövlət qeydiyyatına alınıb. Cəmiyyətin 30%-i və ya nizamnamə kapitalının 30 milyon manatı “Klovan” MMC-yə, 70%-i və ya nizamnamə kapitalının 70 milyon manatı “Global Agro İndustry FZCO” şirkətinə məxsusdur.

“Xəyal Adası” MMC-nin nizamnamə kapitalı 100 milyon manat təşkil edir. Cəmiyyətin nizamnamə kapitalı 2019-cu ilin Fevral ayında 10 milyon manatdan 100 milyon manata yüksəldilib. 

Cəmiyətin aşağıdakı törəmə müəssisəsi vardır:

1. “SUBİS SUN Beynəlxalq Məktəbi” MMC- Nizamnamə kapitalı 500 000 AZN, 100%-pay sahibliyi ilə nəzarət edir.

2. “SUBİS SUN Beynəlxalq Uşaq bağçası” MMC-Nizamnamə kapitalı 100 000 AZN, 100%-pay sahibliyi ilə nəzarət edir

3. "19 Catering" MMC-in Nizamnamə kapitalı 50 000 AZN, 100% pay sahibliyi ilə nəzarət edir

“XƏYAL ADASI” MMC-in hüquqi ünvanı və faktiki ünvanı AZ1045, Bakı şəhəri Suraxanı rayonu, Hava Limanı-Zığ Şossesi, ev 20, 12-ci km-dir.