Daşınmaz əmlakın inkişafı, investisiyası və idarə olunması sahəsində Azərbaycanın aparıcı şirkətlərindən olan “PMD Group” Xəzər İnşaat Həftəsinin Baş sponsoru qismində çıxış edib.

Ölkəmizdə regionun inşaat sektorunun aparıcı sənaye platformalarından olan 30-cu Yubiley Xəzər İnşaat Həftəsi keçirilib. 14-16 oktyabr tarixlərində Bakı Ekspo Mərkəzində baş tutan tədbir çərçivəsində Qafqazın əsas ixtisaslaşdırılmış inşaat sərgisi 30-cu Yubiley Azərbaycan Beynəlxalq İnşaat Sərgisi – “BakuBuild” keçirilib.

Ümumilikdə 17 ölkədən 299 şirkətin iştirak etdiyi sərgidə PMD Group-a məxsus və FMG şirkəti tərəfindən idarə edilən “Ağdam Rezidens” və “Baku Tower” layihələri iştirakçılar tərəfindən böyük marağa səbəb olub. Gələn qonaqlara layihələr haqqında ətraflı məlumat verilib.

Bakı şəhərinin mərkəzində Heydər Əliyev prospektində yerləşən, Azərbaycanın və Cənubi Qafqazın ən hündür göydələni olan “Baku Tower” bir PMD layihəsidir və əmlakın idarəedilməsi sahəsində geniş portfelə sahib FMG şirkəti tərəfindən idarə olunur. Müasir və postmodern memarlıq üslubunda inşa edilmiş 50 mərtəbədən ibarət bu bina, bizneslər üçün geniş və funksional ofis, eləcə də kommersiya sahələri ilə yanaşı, əsaslı infrastrukturu sayəsində iş dünyasına ən yüksək standartlara cavab verən şərait təqdim edir.

Qarabağın incisinə çevrilən Ağdamın mərkəzində inşa edilmiş ilk yaşayış kompleksi olan “Ağdam Rezidens” layihəsi ilkin mərhələdə nəzərdə tutulan və tikintisi tamamlanaraq yaşayışa təhvil verilən 6 binadan ibarət olub. Bu il keçirilən sərgidə isə kompleksin ikinci və üçüncü mərhələsi üçün nəzərdə tutulmuş növbəti 8 bina təqdim edilib. Ümumilikdə 14 binadan ibarət yeni yaşayış kompleksi özünün müasir memarlığı, əlverişli yerləşmə, rahat mənzilləri və yüksək infrastrukturu ilə seçilir. Strateji əhəmiyyətə malik bölgədə tikilən “Ağdam Rezidens” həm yaşayış, həm də investisiya baxımından yeni fürsətlər üçün olduqca sərfəlidir.

Məlumat üçün bildirək ki, “Ağdam Rezidens” daşınmaz əmlakın inkişafı, investisiyası və idarə olunması sahəsində Azərbaycanın aparıcı şirkətlərindən biri olan “PMD Group” a məxsus layihədir.

Qeyd edək ki, Xəzər İnşaat Həftəsi iştirakçılar üçün işgüzar əlaqələrin qurulması, yeni bazarlara çıxış, eləcə də sektor üzrə beynəlxalq əməkdaşlıqların genişləndirilməsi baxımından effektiv platforma kimi çıxış edir. Region üçün əhəmiyyətli olan tədbirdə Azərbaycanla yanaşı, dünyanın bir sıra ölkələrindən tikinti sahəsinin qabaqcıl şirkətləri də bir araya gəlib.