Çinin elektrik avtomobili istehsalçısı BYD Avropa İttifaqında (Aİ) 2025-ci ilin avqust ayında 2024-cü ilin avqustuna nisbətən 3 dəfə çox yeni avtomobil sataraq, ABŞ-lı rəqibi Teslanı ardıcıl  ikinci ay geridə qoyub.

Marja.az xəbər verir ki, bu barədə Avropa Avtomobil İstehsalçıları Assosiasiyası (ACEA) məlumat yayıb.

Stellantis isə Avropada bir ildən uzun müddət sonra ilk dəfə satış artımına qayıdıb. Ümumi bazarın genişlənməsində plagin hibrid  (plug-in hibrid-PHEV) və tam elektrikli (BEV) avtomobil satışlarının rolu böyük olub.

Avropanın avtomobil sənayesi bir sıra çağırışlarla üzləşir: ABŞ-ın idxal rüsumları, Çin istehsalçılarının rəqabəti və elektrikli avtomobillərin (EV) tətbiqi üçün yerli qaydaların yerinə yetirilməsi çətinlikləri.

Avtomobil istehsalçıları emissiya standartlarına uyğunlaşmaq üçün daha sərfəli və gəlirli olan PHEV-lərin satışını artırıb. Çin markaları da bu texnologiyadan Avropa İttifaqının Çin istehsalı EV-lərə tətbiq etdiyi rüsumların təsirini azaltmaq və Çin məhsuluna şübhəli yanaşan Avropa sürücülərini cəlb etmək üçün istifadə edirlər.

RƏQƏMLƏR

ACEA-nın məlumatına görə, Avropa İttifaqı, Böyük Britaniya və Avropa Azad Ticarət Assosiasiyasında avqust ayında satışlar 4,7% artaraq 0,8 milyon avtomobil olub.

Volkswagen və Renault-ln satışları illik müqayisədə müvafiq olaraq 4,8% və 7,8% artıb.

Stellantis-in satışları 2,2% artaraq, 2024-cü ilin fevralından bəri ilk dəfə yüksəlib.

Tesla-nın Avropa satışları 36,6% azalıb, bazar payı keçən ilki 2%-dən 1,2%-ə düşüb. BYD-nin satışları isə 201,3% artaraq bazar payını 1,3%-ə çatdırıb.

Çinli digər avtomobil istehsalçısı MG-nin sahibi SAIC Motor isə avqust ayında satışlarını 59,4% artıraraq, cari il üzrə bazar payını 1,9%-ə yüksəldib və beləliklə, Avropa İttifaqında ilin ən yaxşı on avtomobil satıcısı sırasına daxil olub.

Ümumilikdə Avropa İttifaqında avtomobil satışları 5,3% artıb.

Tam elektrikli avtomobillərin (EV) satışı 30,2%, hibrid elektrikli avtomobillərin satışı 54,5%, plagin hibrid avtomobillərin satışı isə 14,1% artıb.

İş elanları AzVak.az-da