"Forbes" jurnalının 39-cu dəfə dərc etdiyi Milyarderlər Siyahısı, milyarderlərin sayının artdığını göstərib. 

Marja xəbər verir ki, Dünya üzrə milyarderlərin sayı əvvəlki illə müqayisədə 247 nəfər artaraq 3028 nəfərə çatıb.

Beləliklə, rekord sayda insanın yer aldığı siyahıda milyarderlərin sayı bu il ilk dəfə olaraq 3 mini keçib.

Milyarderlərin ümumi sərvəti əvvəlki illə müqayisədə 2 trilyon dollar artaraq 16,1 trilyon dollara çatıb.

Qeyd olunub ki, bu rəqəm ABŞ və Çin xaric digər ölkələrin cəmi Ümumi Daxili Məhsulundan (ÜDM) yüksək olub.

Musk dünyanın ən varlı adamıdır

Tesla, SpaceX, X və xAI kimi şirkətlərin sahibi, amerikalı iş adamı İlon Mask 342 milyard dollar sərvətlə dünyanın ən zəngin adamı kimi siyahıya başçılıq edir.

ABŞ-da müzakirələrə səbəb olan Hökumətin Səmərəliliyi Departamentinin (DOGE) fəaliyyətinə cavabdeh olan Mask SpaceX və onun süni intellekt şirkəti xAI-nin uğurları sayəsində son bir ildə sərvətinə 147 milyard dollar əlavə edib.

Siyahıda 216 milyard dollarlıq sərvətlə ABŞ-ın texnologiya nəhəngi Meta-nın baş direktoru Mark Zukerberq ikinci yerdə, 215 milyard dollarlıq sərvətlə ABŞ-ın e-ticarət nəhəngi Amazon-un qurucusu Ceff Bezos üçüncü yerdə qərarlaşıb.

Oracle proqram təminatı şirkətinin həmtəsisçisi Larri Ellison 192 milyard dollarlıq sərvətlə siyahıda dördüncü, lüks mallar nəhəngi LVMH-nin baş direktoru Bernard Arnault isə 178 milyard dollarlıq sərvətlə beşinci yerdə qərarlaşıb.

Tramp sərvətini ikiqat artırıb

İkinci dəfə ABŞ prezidenti olmağı bacaran Donald Tramp seçkilərdə qələbə qazanmaqla yanaşı, sərvətini də ikiqat artırıb. Trampın sərvəti 2,3 milyard dollardan 5,1 milyard dollara yüksəlib.

Ən çox milyarderin olduğu ölkə ABŞ-dır

ABŞ 902 milyarderlə dünyada ən çox milyarder olan ölkə olaraq qalır. Bu ölkənin ardınca 516 milyarderlə Çin və 205 milyarderlə Hindistan gəlir. 

Qadın milyarderlər siyahının 13,4 faizini təşkil edərək sayı 406 nəfər olub. Dünyanın ən varlı qadını 101 milyard dollar sərvəti ilə ABŞ-ın pərakəndə nəhəngi Walmart-ın varisi Alice Walton-dur.

Milyarderlərin orta yaşı 66 olduğu halda, ən yaşlı milyarder ABŞ-ın 103 yaşlı sığorta maqnatı Corc Cozefdir.

Almaniyanın əczaçılıq şirkəti Boehringer Ingelheim-in varisi 19 yaşlı Yohannes fon Baumbax ən gənc milyarder kimi siyahıda yer alıb.