Avropada ifrat sağçı və irqçi partiyaları dəstəklədiyi üçün əks reaksiyaların diqqət mərkəzində olan İlon Maskın şirkəti Tesla, bütün Avropada satışlarında kəskin azalma ilə üzləşib.

Marja xəbər verir ki, Avropa Avtomobil İstehsalçıları Assosiasiyasının (ACEA) məlumatına görə, Tesla-nın Avropa İttifaqında satışları yanvar ayında 50,3 faiz azalıb. 2024-cü ilin yanvar ayında 15 min 130 ədəd Tesla satıldığı halda, satışlar 2025-ci ilin yanvarında 7 min 517 ədədə düşüb.

Tesla-nın satışlarında kəskin azalma müşahidə edilsə də, bütün bölgədə elektrikli avtomobil satışlarının artım sürəti davam edib. Yanvarda tam elektriklə işləyən avtomobillərin (BEV) satışı 34 faiz, hibrid elektrik avtomobillərinin (HEV) satışı isə 18,4 faiz artıb. Plug-in hibrid (PHEV) satışları isə 8,5 faiz azalıb.

Yanvar ayında bütün hibridlər də daxil olmaqla elektrik avtomobillərinin (BEV, HEV və PHEV) satışı bütün yeni avtomobil satışlarının 57,2 faizini təşkil edib. Ötən ilin yanvarında bu göstərici 47,4 faiz idi.

Yanvarda Avropada cəmi avtomobil satışları 2,1 faiz azalıb, benzin və dizellə işləyən avtomobillərin satışı elektrik və hibrid avtomobillərin satış artımından daha sürətli düşüb.

Avropa Avtomobil İstehsalçıları Assosiasiyasının (ACEA) məlumatlarına görə, Avropa İttifaqı, Avropa Azad Ticarət Assosiasiyası (EFTA) və Böyük Britaniyada yeni avtomobil satışları yanvar ayında 1 milyon ədəddən aşağı düşüb, bu, avqust ayından bəri ən aşağı göstəricidir.

Ən böyük bazarlardan biri olan İspaniyada avtomobil satışı 5,3 faiz artarkən, Fransada 6,2 faiz, İtaliyada 5,8 faiz, Almaniyada 2,8 faiz azalıb. İngiltərədə satışlar 2,5 faiz düşüb.

Volkswagen-in satışları 5,3 faiz, Renault-ın satışları 5,4 faiz artıb, Stellantis-ın satışları isə 16 faiz azalıb.

Avropanın avtomobil istehsalçıları öz daxili bazarlarında yüksək xərcləri azaltmağa və Çindən gələn rəqabətə qarşı mübarizə aparmağa çalışarkən, eyni zamanda ABŞ prezidenti Donald Trampın mümkün idxal tarifləri ilə üzləşməyə hazırlaşırlar.

Tramp alüminium və polad tariflərini artırıb, Meksika və Kanadadan idxal edilən bütün avtomobillərə və yarımkeçiricilərə 25 faiz rüsum tətbiq etməklə hədələyib.