Cənubi Amerika ölkəsi Çilidə ölkənin 99 faizini əhatə edən elektrik enerjisinin kəsilməsi səbəbindən Fövqəladə Vəziyyət elan edilib.

Maja.az xəbər verir ki, yerli medianın məlumatına görə, ölkə daxilində elektrik enerjisinin kəsilməsi 8 milyondan çox insana təsir və həyatı iflic edib.

Demək olar ki, bütün ölkə elektriksiz qaldıqdan və paytaxt Santyaqo başda olmaqla bir çox bölgədə komendant saatı tətbiq etdikdən sonra hökumət fövqəladə vəziyyət elan edib.

Elektrik enerjisinin kəsilməsi nəqliyyatın faliyyətini və gündəlik həyatı ritmini pozub, xüsusilə Santyaqoda nəqliyyatda böyük xaos hökm sürüb.

Çilidə bank, maliyyə, mədən və ticarət fəaliyyətləri dayandırılarkən, minlərlə polis və əsgər ictimai təhlükəsizliyi təmin etmək üçün ərazilərə çıxarılıb.

Yerli media bəzi ərazilərdə elektrik enerjisinin bərpa olunduğunu, lakin nəticədə çoxlu soyuducu, paltaryuyan, qabyuyan maşın və digər məişət texnikasının sıradan çıxdığını bildirib.

Çili prezidenti Qabriel Boric açıqlamasında milyonlarla insanın qurbanına çevrilən bu vəziyyətin qəbuledilməz olduğunu bildirib.

"Bu gün baş verənlər hamımızı qəzəbləndirir. Bir və ya bir neçə şirkətin məsuliyyətsizliyi milyonlarla insanın gündəlik həyatına mənfi təsir göstərib. Məsul şəxslərin məsuliyyətə cəlb olunmasını təmin edəcəyik. Biz də qurumların düzgün işləməsini və bu fövqəladə vəziyyətin tez bir zamanda sona çatmasını istəyirik", - Boric deyib..

"Bilirik ki, bəzi ərazilərdə elektrik enerjisi bərpa olunub, lakin vəziyyət hələ də qeyri-sabitdir. Ona görə də ehtiyatlı davranmalıyıq. Hərbi personal, polis və istintaq qrupları yerlərdədir", - Prezident əlavə edib.

Boric, elektrik enerjisinin kəsilməsinə görə "ISA Chile" şirkətini günahlandırıb. 

Sosial mediada paylaşılan videolardan görünür ki, elektrin enerjisinin kəsilməsi sərnişinləri çətin vəiyyətdə qoyub. Dayanacaqlarda uzun növbələr yaranıb, avtobus və taksi xidmətlərində yaranan fasilələr səbəbindən çoxlu sayda insan evlərinə qayıtmaqda çətinlik çəkib.