Rusiya prezidenti Vladimir Putin və Amerika Prezidenti Donald Tramp danışıqlar aparıblar. 

Marja xəbər verir ki, iki ölkə liderləri arasında telefon danışığı barədə Rusiya prezidentinin mətbuat katibi Dmitri Peskov brifinqdə məlumat verib.

Bu, Rusiya və ABŞ liderləri arasında son 3 ildə ilk söhbət olub. Rusiya prezidenti sonuncu dəfə Trampın sələfi Co Baydenlə eyni gündə - 2022-ci il fevralın 12-də danışıb.

Peskov deyib: "Bu, çox uzun telefon danışığı idi, demək olar ki, bir saat yarım davam etdi".

Tramp son həftələrdə Rusiya prezidenti ilə danışdığını dəfələrlə bəyan edib. Amerika lideri Ukraynadakı münaqişəyə böyük diqqət yetirib və onun sona çatmasına kömək etmək arzusunu bildirib.

XXX

Kremlin yaydığı məlumatda bildirilir: 

Rusiya prezidenti Vladimir Putinlə Amerika Birləşmiş Ştatlarının prezidenti Donald Tramp arasında telefon danışığı olub

- Dövlət başçıları Rusiya və ABŞ vətəndaşlarının mübadiləsi ilə bağlı məsələləri müzakirə ediblər. ABŞ prezidenti əmin edib ki, Amerika tərəfi əldə olunmuş bütün razılaşmaları yerinə yetirəcək.

- Ukraynada nizamlanma mövzusu da müzakirə olunub. Donald Tramp hərbi əməliyyatların tezliklə dayandırılması və problemin sülh yolu ilə həllinin tərəfdarı olduğunu bildirib. Vladimir Putin isə öz növbəsində münaqişənin köklü səbəblərini aradan qaldırmağın zəruriliyini qeyd edib və Donald Trampla razılaşıb ki, uzunmüddətli nizamlanmaya sülh yolu ilə nail olmaq olar.

- Rusiya Prezidenti Amerika dövlətinin başçısının əsas tezislərindən birini də dəstəkləyib: "Ölkələrimizin birgə işləmək vaxtı çatıb".

- Söhbət zamanı Yaxın Şərq nizamlanması, İranın nüvə proqramı, eləcə də iqtisadi sahədə ikitərəfli Rusiya-Amerika münasibətləri mövzularına toxunulub.

- Rusiya prezidenti ABŞ prezidentini Moskvaya səfərə dəvət edib və Amerika rəsmilərini Rusiyada qarşılıqlı maraq doğuran sahələr, o cümlədən Ukrayna nizamlanması üzrə qəbul etməyə hazır olduğunu bildirib.

- Vladimir Putin və Donald Tramp şəxsi görüşlərin təşkili də daxil olmaqla, şəxsi əlaqələri davam etdirmək barədə razılığa gəliblər.