Azərbaycanın gənc istedadları Beynəlxalq Riyaziyyat İmtahan Mərkəzinin təşkil etdiyi IMEC (International Mathematics Examination Competition) Beynəlxalq Riyaziyyat Olimpiadasının seçim turunda iştirak ediblər.

Azərbaycanda keçirilmiş yerli seçim mərhələsində 2500 məktəbli, o cümlədən 44 günlük Vətən müharibəsinin şəhid və qazilərinin ailələrindən olan 23 məktəbli iştirak edib. Olimpiadada iştirak edən şəhid və qazi ailələrindən olan məktəblilərin qeydiyyat xərclərini tam olaraq “McDonald's Azərbaycan” şirkəti qarşılayıb.

İştirakçılar arasında, xüsusilə , şəhid polkovnik-leytenant Əkrəm Şadmanovun oğlu Araz Şadman zadə uğurla iştirak edərək qızıl medal qazanıb. Araz aprel ayında Avstraliyanın Sidney şəhərində keçiriləcək olimpiadanın final mərhələsində Azərbaycanı təmsil edəcək, qaliblər sırasına daxil olub. “McDonald's Azərbaycan” Arazın bu nüfuzlu yarışda iştirak və səfər xərclərini öz üzərinə götürüb.

Bundan əlavə, şəhid və veteran ailələrindən olan üç iştirakçı gümüş, dörd iştirakçı isə bürünc medala layiq görülüb. “McDonald's Azərbaycan”ın təşəbbüsü və maliyyə dəstəyi ilə bu uşaqların “Sea Breeze”də keçiriləcək yay təhsil düşərgəsində iştirakı qərara alınıb. Burada onlar həm istirahət edə, həm də dəyərli bilik və bacarıqlar əldə edə biləcəklər.

Bu dəstək “McDonald's Azərbaycan” şirkəti ilə Azərbaycan Dövlət Sosial Müdafiə Fondu (DSMF) arasında imzalanmış Anlaşma Memorandumu çərçivəsində həyata keçirilir. İmzalanan memorandum korporativ sosial məsuliyyət layihələrinin həyata keçirilməsi üçün uzunmüddətli və səmərəli münasibətlərin qurulması və inkişafı məqsədilə əməkdaşlığın çərçivələrini müəyyən edir. Anlaşma Memorandumu həmçinin 44 günlük Vətən müharibəsi zamanı canından keçmiş şəhidlərin və müharibə veteranlarının övladlarına dəstək məqsədilə bir sıra birgə təşəbbüslərin həyata keçirilməsi üçün əsas rolunu oynayır.

“McDonald's Azərbaycan” gənc nəslə inkişaf etmək və potensiallarını üzə çıxarmaq üçün imkanlar yaratmaqla korporativ sosial məsuliyyət missiyasını davam etdirir.