"Mərkəzi Bankın yenilənmiş məcburi ehtiyat qaydaları bank sektorunda təmərküzləşməni azaltmaqla bərabər, depozit sahəsində aktiv rəqabətə səbəb olub. Əvvəllər böyük banklarda əmanət faizləri 5-6 faiz, digər banklarda 10-11 faiz aralığında idi. İndi isə bu normalaşıb".

Marja.az xəbər verir ki, bunu Mərkəzi Bankın sədri Taleh Kazımov bildirib. 

Mərkəzi Bankın sədri qeyd edib ki, yenilənmiş məcburi ehtiyat qaydaları iri bankların xərclərini artırır:

"Təmərküzləşmə (cəmlənmə, toplanma, mərkəzləşmə - red) məsələsinə gəldikdə -  məcburi ehtiyat qaydalarına baxsaz, orada təmərküzləşmənin aradan qaldırılması üçün normalar yaratmışıq. Hansı bankda həddindən artıq təmərküzləşmə varsa, onlar daha çox məcburi ehtiyatlar yaratmalıdırlar. Hansı bankda təmərküzləşmə var idi - indi onların xərcləri daha çox artır, çünki daha çox məcburi ehtiyatlar saxlamalıdırlar. Bunun nəticəsi olaraq görürük ki, həmin banklarda təmərküzləşmə cüzi də olsa azalmaqdadır. 

Həm də böyük, sistem əhəmiyyətli banklar digər banklar ilə öhdəlik tərəfdə rəqabət aparmağa başlayıblar. Böyük banklarda əmanət faizləri  5-6 faiz, digər banklarda 10-11 faiz aralığında idi. İndi isə bu normalaşıb. Bunun nəticəsi olaraq banklar depozit sahəsində aktiv rəqabət aparmağa başlayıblar".  

Taleh Kazımov, "Bu il məcburi ehtiyat normalarının dəyişdirilməsi - azalıldılması və ya artırılması planımız yoxdur", -əlavə edib. 

Mərkəzi Bankın sədri bildirib ki, ötən 3 il ərzində Mərkəzi Bankın valyuta ehtiyatları 54 faiz artıb:

"Apreldə mənim Mərkəzi Bankda 3 ilim olacaq. 3 il ərzində Mərkəzi Bankın ehtiyatları 54% artıb. Bu o deməkdir ki, Mərkəzi Bank 2022-ci ilin əvvəlinə olan ehtiyat həcminə 54% valyuta ekvivalentində manat çap edib. Bank sektorunda kifayət qədər yüksək likvidlik var idi. Bir fürsət idi ki, biz o likvidliyi sterilizasiya edərək ehtiyatları artıraq. Biz 3 il ərzində ehtiyatlarımızı 54% artırdıq, bu hamımızın kifayət qədər böyük uğurudur".