ABŞ-ın Apple şirkəti 2024-cü ildə "Çinin ən böyük smartfon satıcısı" titulunu itirərək yerini yerli rəqibləri Vivo və Huawei-yə uduzub. "Canalys" araşdırma şirkətinin məlumatlarına görə, iPhone telefonlarının istehsalçısı olan Apple-ın Çində illik satışı 17 faiz azalıb.

Marja.az xəbər verir ki, ötən ilin dörd rübü ərzində baş verən azalma Apple-ın Çin bazarında ən böyük illik satış azalmasıdır. Xüsusilə ilin son rübündə 25 faizlik azalma diqqəti çəkir. 

Vivo və Huawei liderdir

Büdcəyə uyğun smartfon markası Vivo 17 faiz bazar payı ilə Çin bazarında liderliyi ələ keçirib, onun ardınca premium seqmentdəki rəqibi 16 faizlə Huawei gəlir. Apple-ın bazar payı 15 faiz təşkil edib. Bu vəziyyət Apple-ın ən böyük qlobal bazarlarından biri olan Çində yerli istehsalçıların yaratdığı artan satış təzyiqini ortaya qoyur.

Süni intellektin olmaması rəqabət qabiliyyətinə mənfi təsir edir

Apple-ın tənəzzülü göstərir ki, Çində satışa çıxarılan ən yeni iPhone modellərində süni intellekt xüsusiyyətlərinin olmaması və ChatGPT kimi alətlərin əlçatan olmaması onun rəqabət qabiliyyətinə zərbə vurur.

Apple-ın premium seqmentdəki mövqeyi bir çox problemlərlə üzləşir: Huawei flaqman telefon təqdimatları, yüksək qiymətli seqmentdə yerli qatlana bilən telefonların çoxalması, Xiaomi və Vivo kimi brendlərin texnoloji yenilikləri istehlakçı loyallığını artırır.

Huawei güclü geri dönüş edib

2019-cu ildə ABŞ-ın sanksiyaları səbəbindən Huawei-nin Amerika texnologiyalarına çıxışı məhdudlaşdırıldıqdan sonra Apple dörd il ərzində Çin bazarında sabit artım əldə edib. Bununla belə, Huawei 2023-cü ilin avqustunda yerli çiplər ilə istehsal edilən yeni telefonlarını satışa çıxararaq premium seqmentdə güclü bir dönüş edib. Çin şirkəti ilin son rübündə satışını 29 faiz artırmağı bacarıb.

Apple isə bu dövrdə satışlarını stimullaşdırmaq üçün nadir endirimlərə əl atıb. Şirkət 4-7 yanvar tarixləri arasında Çində dörd günlük kampaniya keçirərək, iPhone 16 modellərinə 500 yuana (68,50 ABŞ dolları) qədər endirimlər təqdim edib.

Xiaomi inkişafın zirvəsindədir

"Canalys"ın məlumatlarına görə, büdcə yönümlü Xiaomi Çinin ilk beş istehsalçısı arasında ən güclü artımı göstərib. Şirkət ilin son rübündə tədarüklərini 29 faiz artırıb. Oppo və Vivo müvafiq olaraq 18 faiz və 14 faiz artım qeyd ediblər.

2024-cü ildə Çində smartfon satışı 4 faiz artaraq 285 milyon ədədə çatıb.