İspaniyanın Baş naziri Pedro Sançes (Pedro Sánchez) ölkədəki mənzil (ev) böhranına həll yolu tapmaq üçün Avropa İttifaqı (Aİ) üzvü olmayan ölkələrdən olan alıcılar üçün yeni tənzimləmə təklif edib.

Marja xəbər verir ki, bu kontekstdə Avropa İttifaqı vətəndaşı olmayanlar İspaniyada daşınmaz əmlak alarkən əmlakın dəyərinin 100 faizi həcmində "cəza vergisi" ödəməli olacaqlar.

Bu təklif mənzil qiymətlərinin sürətlə artdığı və yeni tikililərin tələbatdan geridə qaldığı bir şəraitdə ortaya çıxıb. Sançez qeyd edib ki, bu tədbir mənzil bazarındakı ağır vəziyyətə həll yolu tapmağa kömək edəcək.  Baş nazir, "Qərb, zəngin mülk sahibləri və kasıb kirayəçilər cəmiyyətinə çevrilmək problemi ilə üz-üzədir" deyib.

Uzun illərdir ki, İspaniya tətil evi almaq və ya daha günəşli bir iqlimə köçmək istəyən əcnəbilərin sevimli məkanı olub. Bununla belə, hökumət, xüsusilə ABŞ, Meksika və Venesuela kimi ölkələrdən gələn zəngin əcnəbilərin yeni dalğasının qiymətləri artırdığına diqqət çəkib. Britaniyalılar da Brexit-dən sonra Aİ vətəndaşı statuslarını itirmələrinə baxmayaraq, İspaniyanın cənub sahillərində əmlak bazarında mühüm rol oynamağa davam edirlər.

Baş nazir Sançes, Avropa İttifaqına daxil olmayan ölkələrdən alıcıların ildə 27 min ev aldığını və bu satınalmaların "əsasən spekulyasiya məqsədləri üçün" olduğunu söyləyib. Yeni tənzimləmə rüsumlarda da dəyişiklik edilməklə və ya xüsusi vergi tətbiq edilməklə həyata keçiriləcək.

Hazırda İspaniyada daşınmaz əmlak alqı-satqısı yeni və ya mövcud əmlakın alınmasından asılı olaraq 7 faizdən 12 faizə qədər vergiyə cəlb edilir. Bununla belə, hökumətin təklif etdiyi 100 faizlik vergi Aİ-dən kənardan alışların qarşısını almaq məqsədi daşıyır.

Avropada artan mənzil böhranı

Pedro Sançez, son 10 ildə Avropada ev qiymətlərinin 48 faiz artdığını və eyni dövrdə ev təsərrüfatlarının gəlirlərindəki artımın bu nisbətin demək olar ki, yarısı olduğunu qeyd edərək deyib: “Bu, böyük sosial və iqtisadi nəticələri olan ciddi problemdir. Bu, dövlət qrumlarının rəhbərlik etdiyi və bütün cəmiyyətin cəlb olunduğu qətiyyətli reaksiya tələb edir."